বিয়াখনত সন্মতি নাছিল কইনাৰ পৰিয়ালৰ। যাৰ বাবে নিজৰ প্ৰিয় যুৱকজনৰ সৈতে পলাই গৈছিল ছোৱালীজনী। সেয়াই যেন কাল হ’ল দুয়োৰে বাবে।
বিয়া হোৱাৰ পাঁচ বছৰৰ পিছত সম্পৰ্ক গঢ়াৰ বাবে জোৱায়েকৰ সৈতে যোগাযোগ কৰিলে কইনাৰ পৰিয়ালে। সেই আমন্ত্ৰণ ৰক্ষা কৰি পত্নীৰ ঘৰ পালেগৈ স্বামী। কিন্তু জীৱন্তে আহিব নোৱাৰিলে ঘৰলৈ।
পোতক তুলিবলৈ নিজ জোৱাইক হত্যা কৰিলে কইনাৰ পৰিয়ালে।
দুসপ্তাহমান পূৰ্বে গ্ৰেটাৰ নয়ডাত সংঘটিত হৈছে এই ঘটনা।
আৰক্ষীয়ে জনোৱা মতে, পাঁচ বছৰ পূৰ্বে যুৱক-যুৱতীজনৰ বিবাহ হৈছিল। বিয়াখনত যুৱতীগৰাকীৰ পৰিয়ালৰ মত নাছিল। সেইবাবেই সিহঁতে পলাই গৈ বিয়া পাতিলে। পাঁচ বছৰৰ পাছত দেউতাকৰ ঘৰৰ পৰা ফোন এটা পাই যুৱতীগৰাকীয়ে আনন্দত আত্মহাৰা হৈ পৰিল। যুৱতীগৰাকীৰ পৰিয়ালে স্বামীৰ সৈতে মিলন ঘটাব বিচাৰিছে। সেইবাবেই যুৱতীগৰাকীৰ স্বামীক ঘৰলৈ নিমন্ত্ৰণ কৰা হৈছিল। শহুৰেকৰ পৰা ফোন পাই যুৱকজন আনন্দৰে গুচি গ’ল।
শহুৰেকৰ ঘৰৰ পৰা উভতি অহাৰ পথত দুস্কৃতিকাৰীয়ে বাটতে ডিঙি চেপি হত্যা কৰে তেওঁ।
যোৱা ১৬ জুনত সুৰজপুৰ থানাৰ সন্মুখত উদ্ধাৰ হৈছিল তেওঁৰ মৃতদেহ। আৰক্ষীৰ তথ্য অনুসৰি যুৱতীগৰাকীৰ পৰিয়ালে ভাড়াতীয়া হত্যাকাৰীক ধন দি যুৱকজনক হত্যা কৰে।
ইতিমধ্যে দুই ভাড়াতীয়া হত্যাকাৰী গ্ৰেপ্তাৰ। আৰু ২ জন অভিযুক্ত পলাতক। হত্যাকাণ্ডত ব্যৱহৃত আগ্নেয়াস্ত্ৰ, এখন টাৱেল আৰু গাড়ী জব্দ কৰা হৈছে বুলি আৰক্ষীয়ে জানিবলৈ দিয়ে।
