ইউৰো কাপৰ ফাইনেলত প্ৰৱেশ কৰিছে ইংলেণ্ডে। ছেমি ফাইনেলত ইংলেণ্ডে নেদাৰলেণ্ডক ২-১ গ’লত পৰাস্ত কৰে। অৱশ্যে খেলখনৰ আৰম্ভণিতে ডাচ দলটোৱে অগ্ৰগতি লাভ কৰিছিল যদিও সেই অগ্ৰগতি ধৰি ৰাখিব নোৱাৰিলে নেদাৰলেণ্ডে। চাৰি বছৰৰ পাছত ইংলেণ্ডে পুনৰ ডাঙৰ প্ৰতিযোগিতাত চেম্পিয়ন হোৱাৰ সুযোগ লাভ কৰিছে।
ইংলেণ্ডে শেহতীয়াকৈ হাই প্ৰফাইল দল গঢ়িও ট্ৰফী লাভ কৰাত ব্যৰ্থ হৈছে। এই বছৰ স্পেইনতকৈ তেওঁলোকৰ ফাইনেললৈ যোৱাৰ পথ অলপ সহজ আছিল। ফলত হেৰী কেন, বুকায়ো ছাকাৰাৰ দলটোৱে ফাইনেলত স্পেইনক পৰাস্ত কৰিব পাৰিলেই ইউৰোপীয় চেম্পিয়নশ্বিপ লাভ কৰিব।
যোৱাবাৰো গেৰেথ চাউথগেটৰ প্ৰশিক্ষণৰ অধীনত ইংলেণ্ডে ইউৰো কাপৰ ফাইনেলত প্ৰৱেশ কৰিছিল যদিও ট্ৰফী লাভ কৰিব পৰা নাছিল। এইবাৰ ব্যৰ্থতা অঁতৰাই ট্ৰফী জয়ৰ সুযোগ পাইছে।
লগতে পঢ়কঃ গুৱাহাটীত আটক “ভুৱা চিকিৎসক”, বছৰ বছৰ ধৰি চলাই আহিছিল ক্লিনিক
খেলখনৰ ৮ মিনিটত ছিমনে নেদাৰলেণ্ডক অগ্ৰগতি প্ৰদান কৰে। তেওঁ এটা আচৰিত শ্বটেৰে টপ কৰ্ণাৰত বল ৰাখি দলটোক আগুৱাই লৈ গ’ল। আগবাঢ়ি যোৱাৰ পিছতো অৱশ্যে ভ্যান জিকৰ দলৰ খেলত জড়তা আছিল। তাৰ সুবিধা ল’লে ইংলেণ্ডে।
খেলৰ ১৮ মিনিটত ডাচ ডিফেণ্ডাৰ ডামফ্ৰাইছে হেৰী কেনক ৰখাব নোৱাৰি ফাউল কৰে, ফলত ইংলেণ্ড দলে বক্সৰ ভিতৰত কৰা ফাউলৰ বাবে পেনাল্টি লাভ কৰে। জাৰ্মানীত ক্লাব ফুটবল খেলা ইংৰাজী ষ্ট্ৰাইকাৰ হেৰী কেনে কোনো ভুল নকৰি স্পট কিকৰ পৰা গ’ল দি স্ক’ৰলাইন ১-১ কৰে। তেতিয়া খেলখন ৰোমাঞ্চকৰ হৈ পৰে। দুয়োটা দলে কিছু পৰিমাণে ৰক্ষণাত্মক ফুটবল খেলিবলৈ আৰম্ভ কৰিছিল যদিও বলৰ পজিছন আৰু শ্বটৰ ক্ষেত্ৰত গেৰেথ চাউথগেটৰ দলটো আগবাঢ়ি আছিল।
খেলখনৰ ৮৯ মিনিটলৈকে স্ক’ৰলাইন ১-১ আছিল। ডৰ্টমুণ্ডৰ ঘৰুৱা খেলপথাৰত যেতিয়া সকলোৱে ধৰি লৈছিল যে মেচখন অতিৰিক্ত সময়লৈ যাব, তেতিয়াই ক্লাইমেক্স আহিল। খেলখন শেষ হোৱাৰ কেইমিনিটমান পূৰ্বে অলি ৱাটকিন্সে গ’ল দি ইংলেণ্ডক অগ্ৰগতি প্ৰদান কৰে। ৯০ মিনিটত গ’ল খাই নেদাৰলেণ্ডৰ বাবে প্ৰত্যাৱৰ্তন কৰাটো অতি কঠিন হৈ পৰিছিল। শেষত ডাচ দলটোৱে মেচখনত ২-১ গ’লত পৰাস্ত হৈ ইউৰো এৰিলে।
লগতে পঢ়কঃ ডিগবৈৰ বিদ্যালয়ত শিক্ষাৰ্থীৰ ওপৰত খহি পৰিল শ্ৰেণীকোঠাৰ ফেন, আহত দুই চতুৰ্থ শ্ৰেণীৰ ছাত্ৰ
ইংলেণ্ডৰ প্ৰশিক্ষকে ৱাটকিন্সক অন্তিম মুহূৰ্তত আনি মেচখনৰ আক্ৰমণ বৃদ্ধি কৰিছিল। কাৰণ আগতে বহুবাৰ দেখা গৈছে যে ইংলেণ্ডৰ টাইব্ৰেকাৰত ভাগ্যই কোনো সহায় কৰা নাই। সেই কৌশলে কাম কৰাৰ লগে লগে ইউৰোৰ ফাইনেলত প্ৰৱেশ কৰে থ্ৰী লায়ন্সে।
দেওবাৰে নিশা ফাইনেলত স্পেইনৰ বিৰুদ্ধে খেলিব ইংলেণ্ডে। ইংলেণ্ডৰ বাবে ট্ৰফীৰ ব্যৰ্থতা ভাঙিবলৈ এয়া এক সোণালী সুযোগ। অৱশ্যে কোৱা বাহুল্য যে ভাল ফৰ্মত থকা লেমিন ইয়ামাল আৰু অলমো বাহিনীৰ বিৰুদ্ধে ইংলেণ্ড দলৰ কাম সহজ নহ’ব।
