নগাঁও জিলাৰ ধিঙত কালি সংঘটিত লজ্জাজনক ধৰ্ষণৰ ঘটনাক ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক ধিক্কাৰ জনাইছে আৰু এই ঘৃণনীয় কাণ্ডত জড়িতসকলক তৎকালে চিনাক্ত কৰি কঠোৰ শাস্তি বিহিবলৈ দাবী জনাইছে। পশ্চিমবংগৰ আৰ জি কৰ হস্পিতালতৰ নাৰকীয় ধৰ্ষণ কাণ্ডৰ কঁপনি মাৰ নাযাওঁতেই ধিঙত পুনৰ এনে ঘৃণনীয় কাণ্ড সংঘটিত হৈছে। ৰাজ্যৰ নাৰী নিৰাপত্তাৰ দিশটোও এই ঘটনাই পুনৰ উদঙাই দিছে। ডি ৱাই এফ আইয়ে ধৰ্ষণকাৰীক কঠোৰ শাস্তিৰ লগতে নাৰীৰ সুৰক্ষা নিশ্চিত কৰিবলৈ দাবী জনাইছে।
মুখ্যমন্ত্ৰীৰ সাংবাদিকক অপদস্ত কৰা কাৰ্যক তীব্ৰ নিন্দা ডি ৱাই এফ আইৰ
গুৱাহাটীত সাংবাদিকৰে মত বিনিময় কৰাৰ সময়ত মুখ্যমন্ত্ৰী হিমন্ত বিশ্ব শৰ্মাই এগৰাকী সাংবাদিকক তুচ্ছ-তাচ্ছিল্য কৰি অপদস্ত কৰা কাৰ্যক ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে তীব্ৰ নিন্দা কৰিছে আৰু এনে নিকৃষ্ট কাণ্ডৰ পৰা বিৰত থাকিবলৈ মুখ্যমন্ত্ৰীৰ প্ৰতি আহ্বান জনাইছে। শ্বাহ আলম নামৰ সাংবাদিক গৰাকীয়ে মুখ্যমন্ত্ৰীৰ সমষ্টি জালুকবাৰীৰ মান্দাকাটাত কৃত্ৰিম বান আৰু অবৈধ পাহাৰ খনন সম্পৰ্কত এক প্ৰশ্ন কৰিছিল। এই প্ৰশ্নত জাঙুৰ খাই উঠা মুখ্যমন্ত্ৰীয়ে সাংবাদিক জনৰ নাম সুধি তুচ্ছ-তাচ্ছিল্য আৰম্ভ কৰে। সাংবিধানিক পদত অধিষ্ঠিত মুখ্যমন্ত্ৰী এজনে এনেদৰে অসংবিধান আৰু সাম্প্ৰদায়িক মন্তব্যৰে সাংবাদিকক অপমান কৰা কথাটোৱে ৰাজ্যৰ গণতান্ত্ৰিক, চিন্তাশীল লোকক চিন্তিত কৰি তুলিছে। এনে অসংবিধানিক, নিন্দনীয় কাৰ্যৰ পৰা বিৰত থাকিবলৈ ডি ৱাই এফ আইয়ে মুখ্যমন্ত্ৰীলৈ আহ্বান জনাইছে।
