উন্নয়নৰ গংগা! বিজ্ঞাপনৰ নামত ১০ বছৰত মোদী চৰকাৰে ব্যয় কৰিলে ৪,৪৮২.৮৬ কোটি

প্ৰেক্ষাপটত পুনৰ এবাৰ মোদী চৰকাৰ! এইবাৰৰ বিষয় বিগত দহ বছৰত বিভিন্ন প্ৰচাৰ মাধ্যমত বিজ্ঞাপনৰ নামত কিমান টকা খৰচ কৰিলে নৰেন্দ্ৰ মোদী চৰকাৰে৷উক্ত খৰচ সম্পৰ্কত নৰ্থ ইষ্ট নাওৰ সাংবাদিক কোকিল শইকীয়াই কেন্দ্ৰীয় যোগাযোগ সংস্থা চমুকৈ CBC লৈ প্ৰেৰণ কৰা RTI আবেদনত আশ্চৰ্যজনক তথ্য পোহৰলৈ আহিছে৷

শইকীয়াই প্ৰেৰণ কৰা আবেদনৰ ভিত্তিত কেন্দ্ৰীয় যোগাযোগ সংস্থাই বিজ্ঞাপন আৰু দৃশ্য প্ৰচাৰ সঞ্চালকালয়ৰ দ্বাৰা চৰকাৰী বিজ্ঞাপনৰ নামত খৰচ কৰা ধনৰ তালিকা প্ৰদান কৰিছে৷উক্ত হিচাপত ইণ্টাৰনেট,এছএমএছ আৰু ডিজিটেল চিনেমাৰ দ্বাৰা হোৱা বিজ্ঞাপনৰ খৰচ সংস্থাটোৱে প্ৰদান কৰিছে৷

আৰটিআই আবেদন নং- DOAVP/R/X/24/00113ৰ প্ৰত্যুত্তৰত CBC ID No. 02/08/2024/RTI/134ত দিয়া উত্তৰসমূহ তলত উল্লেখ কৰা হ’ল৷
প্ৰশ্ন নং ১- ২০১৪ চনৰ পৰা ২০২৪ চনলৈ বিজ্ঞাপনৰ নামত ভাৰত চৰকাৰে ব্যয় কৰা ধনৰ পৰিমাণ কিমান?
উত্তৰ: ভাৰত চৰকাৰৰ জৰিয়তে কেন্দ্ৰীয় যোগাযোগ সংস্থাই ইণ্টাৰনেট,মেছেজ আৰু ডিজিটেল চিনেমাত ২০১৪-১৫ বিত্তীয় বৰ্ষৰ পৰা ২০২৩-২৪ বৰ্ষলৈকে কৰা ব্যয় কৰা ধনৰ মুঠ পৰিমাণ- ৬৯১.৫১কোটি টকা৷
প্ৰশ্ন নং ২- কোনকেইটা সংবাদ প্ৰতিষ্ঠানক ২০১৪ চনৰ পৰা ২০২৪ চনলৈ বিজ্ঞাপন দিয়া হৈছিল?
উত্তৰ: পোৱা নগ’ল৷
প্ৰশ্ন নং ৩- ২০১৪ চনৰ পৰা ২০২৪ চনলৈ বছৰি সংবাদ প্ৰতিষ্ঠানসমূহে বিজ্ঞাপনৰ নাম কিমান ধন লাভ কৰিলে?
উত্তৰ- ক)ডিজিটেল চিনেমাৰ বিজ্ঞাপনৰ নামত খৰচ হ’ল ৫০০.২৪ কোটি টকা৷
খ) ইণ্টাৰনেটত বিজ্ঞাপনৰ নামত ব্যয় কৰা হ’ল ১৪৬ .৫৬ কোটি টকা৷
গ) মেছেজৰ জৰিয়তে বিজ্ঞাপন দিয়াৰ বাবদ খৰচ হ’ল ৪৬.০১ কোট টকা৷

প্ৰশ্ন নং ৪- ২০১৪ চনৰ পৰা ২০২৪ চনলৈ বিজ্ঞাপনৰ নামত ভাৰত চৰকাৰে ব্যয় কৰা ধনৰ পৰিমাণ কিমান?(ইলেক্ট্ৰ’নিক মিডিয়া)
উত্তৰ: কেন্দ্ৰীয় যোগাযোগ সংস্থাৰ দ্বাৰা ভাৰত চৰকাৰে ইলেক্ট্ৰনিক মিডিয়া যেনে- টেলিভিশ্যন,ৰেডিঅ’ আদিমাধ্যমত ২০১৪ চনৰ পৰা ২০২৪ চনৰ ১৫ আগষ্টলৈকে বিজ্ঞাপনত ব্যয় কৰা মুঠ ধনৰ পৰিমাণ হ’ল- ৩,০৯৮.৫৪ কোটি টকা৷
প্ৰশ্ন নং ৫- কোনকেইটা ইলেক্ট্ৰ’নিক মিডিয়া প্ৰতিষ্ঠানক ২০১৪ চনৰ পৰা ২০২৪ চনলৈ বিজ্ঞাপন দিয়া হৈছিল?
উত্তৰ: পোৱা নগ’ল
প্ৰশ্ন নং ৬- ২০১৪ চনৰ পৰা ২০২৪ চনলৈ বছৰি ইলেক্ট্ৰ’নিক সংবাদ প্ৰতিষ্ঠানসমূহে বিজ্ঞাপনৰ নামত কিমান ধন লাভ কৰিলে?
উত্তৰ: পোৱা নগ’ল৷

এই আৰটিআই প্ৰতিবেদনত প্ৰাপ্ত তথ্য অনুসৰি ২০১৪ চনৰ পৰা ২০২৪ চনৰ আগষ্ট মাহৰ মাজভাগলৈকে ভাৰত চৰকাৰে ১০ বছৰত বিজ্ঞাপনৰ নামত ৪,৪৮২.৮৬ কোটি টকা ব্যয় কৰিলে৷

কিন্তু আশ্চৰ্যজনক কথাটো হ’ল দেশৰ অৰ্থনীতিৰ এই দুৰ্দশাগ্ৰস্ত সময়খিনিত বিজ্ঞাপনত ইমান পৰিমাণৰ ধন খৰচে প্ৰকৃততে কি সূচাইছে? যিটো সময়ত দেশৰ চৰকাৰীখণ্ডৰ চিকিৎসালয়ত পৰ্যাপ্ত চিকিৎসকৰ অভাৱত ৰোগীৰ মৃত্যু হৈছে, ঋণৰ বোজা সহিব নোৱাৰি চৰম পন্থা বাছি লৈ অন্নদাতা কৃষকে সেই সময়ত এই বিজ্ঞাপনৰ প্ৰচাৰ কাৰ বাবে কৰিছে নৰেন্দ্ৰ মোদীয়ে? কোভিডৰ দৰে মহামাৰীৰ সময়তো বিজ্ঞাপনৰ নামত শশ কোটি টকা খৰচ কৰা বিজেপি চৰকাৰে দেখিছেনে দেশৰ বুভুক্ষ জনগণৰ কাতৰ যন্ত্ৰণা৷বিশ্বৰ সুখী দেশসমূহৰ তালিকাত নেপাল(৯৩),পাকিস্তান(১০৮),ম্যানমাৰ(১১৮)তকৈ কৈয়ো পাছত ভাৰতে ১২৬ সংখ্যক স্থানহে লাভ কৰিছে!এনে পৰিস্থিতিত বিজ্ঞাপনৰ নামত এনে সিংহ ধনৰাশি ব্যয় এখন দেশৰ গণতান্ত্ৰিকভাৱে নিৰ্বাচিত চৰকাৰৰ নৈতিকতাৰ বিৰুদ্ধ নহয়নে?