অসমৰ সাংবাদিকতাৰ জগতৰ পৰা অকালতে মেলানি মগাৰ লগতে জীৱনৰ পৰাও মেলানি মাগিলে যুৱ সাংবাদিক উৎপল ডেকাই। জানিব পৰা মতে, এক অচিনাক্ত পোকে কামুৰিছিল উৎপল ডেকাক।
বোধ হয়, অচিন পোকৰ কামুৰতেই যকৃত আৰু বৃক্ক আদিৰ দৰে অংগ বিকল হৈ পৰিছিল উৎপল ডেকাৰ। কিন্তু কি পোকে কামুৰিছিল সাংবাদিকগৰাকীক? কি ৰোগত আক্ৰান্ত হৈ অকাল মৃত্যুক সাৱটি ল’লে যুৱ সাংবাদিকগৰাকীয়ে?
জানিব পৰা মতে যোৱা ১৫ আগষ্টত বন্ধু-বৰ্গৰ সৈতে গুৱাহাটীৰ গড়ভঙা বনাঞ্চলৰ জলপ্ৰপাতলৈ ফুৰিবলৈ গৈছিল উৎপল। জলপ্ৰপাতৰ পানীত নামি গা ধুইছিল উৎপল ডেকাই। তাতেই হেনো এটা অচিনাক্ত পোকে কামুৰিছিল সাংবাদিকগৰাকীক।
ঘৰলৈ ঘূৰি আহি অসুস্থ হৈ পৰিছিল উৎপল ডেকা। লাহে লাহে তীব্ৰ জ্বৰ, গা বিষ আদি উপসৰ্গই দেখা দিছিল। স্বাস্থ্যৰ অৱনতি হৈ অহাত গুৱাহাটীৰ এখন ব্যক্তিগত চিকিৎসালয়ত ভৰ্তি কৰা হৈছিল উৎপলক।
চিকিৎসালয়ত পৰীক্ষা-নীৰিক্ষা কৰি চিকিৎসা আগবঢ়োৱাৰ পিছতো সুস্থ হৈ উঠা নাছিল উৎপল। ক্ৰমশঃ স্বাস্থ্যৰ অধিক অৱনতি হ’বলৈ ধৰিলে। লাহে লাহে বিকল হৈ পৰিল যকৃত, বৃক্ক আদি গুৰুত্বপূৰ্ণ অংগ। প্ৰথমে চিকিৎসকে ধৰিবই পৰা নাছিল উৎপলৰ হৈছে কি!
বহু পৰীক্ষা-নিৰীক্ষাৰ পিছত উৎপলৰ শৰীৰত ধৰা পৰিছিল লেপ্ট’স্পাইৰ’চিছ বেক্টেৰিয়া। এই লেপ্ট’স্পাইৰ’চিছয়েই কাল হৈ পৰিল উৎপলৰ বাবে।
লেপ্ট’স্পাইৰ’চিছ বেক্টেৰিয়া হৈছে এবিধ সংক্ৰমক বেক্টেৰীয়া। ই মানুহৰ পৰা জীৱ-জন্তুলৈ আৰু জীৱ-জন্তুৰ পৰা মানুহলৈ সংক্ৰমণ হ’ব পাৰে। সংক্ৰমিত জীৱই কামুৰিলে বা সংক্ৰমিত জীৱৰ পেচাৱ আদিৰ প্ৰত্যক্ষ সংস্পৰ্শলৈ আহিলে এই ৰোগ হয়।
এই ৰোগত আক্ৰান্ত হ’লে তাৎক্ষণিকভাবে উপযুক্ত চিকিৎসা লাভ কৰিলে সুস্থ হৈ উঠিব পাৰি যদিও চিকিৎসা বা ৰোগ ধৰা পৰোতে পলম হ’লে ৰোগীক বচাব পৰা নাযায়।
