আকৌ আকাশত বোমা। জবলপুৰৰ পৰা হায়দৰাবাদলৈ যোৱা এখন বিমানত বিয়পি পৰে বোমাতংক। বিমানখনে নাগপুৰত জৰুৰীকালীন অৱতৰণ কৰে। ইয়াৰ পাছতে সেই বিমানখনত নিৰাপত্তাৰক্ষীয়ে তালাচী অভিযান চলায়। অৱশ্যে খবৰ অনুসৰি কোনো সন্দেহজনক বস্তু পোৱা নগ’ল।
সংবাদ মাধ্যমৰ খবৰ অনুসৰি দেওবাৰে ইণ্ডিগ’ৰ ৬ ৭৩০৮ নং বিমানে জবলপুৰৰ পৰা হায়দৰাবাদ অভিমুখে ৰাওনা হয়। বিমানখন আকাশৰ মাজত বোমাৰ আতংকৰ সৃষ্টি হয়। লগে লগে পাইলটজনে নাগপুৰ বিমানবন্দৰত থকা এয়াৰ ট্ৰেফিক কণ্ট্ৰ’লৰ সৈতে যোগাযোগ কৰে। এটিএছৰ পৰা গ্ৰীণ চিগনেল পোৱাৰ পাছত নাগপুৰ বিমানবন্দৰত জৰুৰীকালীন অৱতৰণ কৰা হয়।
বিমানবন্দৰত অৱতৰণ কৰাৰ পাছতে বিমানখন খালী কৰা হয়। যাত্ৰীসকলক নিৰাপদ স্থানলৈ লৈ যোৱা হয়, বোমা স্কোয়াডৰ সদস্যসকল স্থানত উপস্থিত হয়। বিমানখনত বৰ্তমান তালাচী চলোৱা হৈছে। বিমানবন্দৰ কৰ্তৃপক্ষৰ মতে, বিমানখনত কোনো সন্দেহজনক বস্তু পোৱা নগ’ল। এই ঘটনাৰ বাবে আতংকিত হৈ পৰে যাত্ৰীসকল।ঘটনা সন্দৰ্ভত ইতিমধ্যে ইণ্ডিগো কৰ্তৃপক্ষই ক্ষমা বিচাৰিছে। যাত্ৰীসকলক সকলো ধৰণৰ সহায় প্ৰদান কৰা হৈছে বুলি জানিবলৈ দিয়ে।
মন কৰিবলগীয়া যে বিগত কেইমাহমানৰ পৰা দেশৰ বিভিন্ন চহৰত এনেধৰণৰ বোমা বিস্ফোৰণৰ বাবে ইমেইল প্ৰেৰণ কৰা হৈছে। বিমানবন্দৰ, চিকিৎসালয় আৰু বিদ্যালয়সমূহ প্ৰায়ে প্ৰেৰকসকলৰ লক্ষ্য হৈ পৰে। কিন্তু প্ৰায় সকলো ক্ষেত্ৰতে শেষত একো পোৱা নগ’ল।
