উৎকট গৰমে দহিছে অসমবাসীক। সকলো জিলাতেই গৰমে ব্যাহত কৰিছে জনজীৱন। বহুদিন ধৰি একেৰাহে প্ৰখৰ ৰ’দ সমগ্ৰ ৰাজ্যত। নাই বৰষুণৰ কোনো বতৰা।
ইয়াৰ মাজতে স্বত্বিৰ নিশ্বাস পেলাবলৈ বতৰ বিজ্ঞান কেন্দ্ৰই আনিছে বৰষুণৰ বতৰা। আহিব বৰষুণ। অহা তিনিদিন ধৰি ৰাজ্যৰ কেইবাখনো জিলাত বৃষ্টিপাতৰ জাননী জাৰি কৰিছে বতৰ বিজ্ঞান কেন্দ্ৰই।
উল্লেখ্য যে যোৱা দেওবাৰে কেইবাখনো জিলাত কম বেছি পৰিমাণ বৰষুণ দিছিল।
ইফালে বতৰ বিজ্ঞান কেন্দ্ৰই জাৰি কৰা জাননী মতে অহা ১০ ছেপ্তেম্বৰত কোকৰাঝাৰ, ধুবুৰী, দক্ষিণ শালমাৰা, গোৱালপাৰা, কৰিমগঞ্জ, হাইলাকান্দি, পশ্চিম কাৰ্বি আংলং, ডিমা হাচাও আৰু কাৰ্বি আংলং জিলাত মজলীয়া পৰিমাণৰ বৰষুণ দিব।
একদৰে ১১ ছেপ্তেম্বৰতো কোকৰাঝাৰ, ধুবুৰী, দক্ষিণ শালমাৰা, গোৱালপাৰা, কৰিমগঞ্জ, হাইলাকান্দি, পশ্চিম কাৰ্বি আংলং, হোজাই, ডিমা হাচাও আৰু কাৰ্বি আংলং মজলীয়া ধৰণৰ বৰষুণ হোৱা সম্ভাৱনা আছে।
১২ ছেপ্তেম্বৰত কোকৰাঝাৰ, দক্ষিণ শালমাৰা, ধুবুৰী, গোৱালপাৰা, বঙাইগাঁও, কাৰ্বি আংলং, পশ্চিম কাৰ্বি আংলং, লখিমপুৰ, মাজুলী, যোৰহাট, শিৱসাগৰ জিলাত বৰষুণ দিয়াৰ সম্ভাৱনা ব্যক্ত কৰিছে বতৰ বিজ্ঞান বিভাগে।
