আজি উচ্চতম ন্যায়ালয়ত অসম আৰক্ষীৰ ভুৱা এনকাউণ্টাৰৰ বিৰুদ্ধে দাখিল কৰা এছ এল পিৰ শুনানি গ্ৰহণ কৰা হয়। আবেদনকাৰীৰ পিআইএল নিষ্পত্তি কৰা গুৱাহাটী উচ্চ ন্যায়ালয়ৰ নিৰ্দেশক প্ৰত্যাহ্বান জনাই এই এছএলপি দাখিল কৰা হৈছিল। জাষ্টিছ সূৰ্যকান্ত আৰু জাষ্টিছ উজ্জ্বল ভূঞাৰ নেতৃত্বৰ বেঞ্চখনে এই শুনানি গ্ৰহণ কৰে।
আবেদনকাৰীয়ে নথি দাখিল কৰিছে য’ত তিনিচুকীয়া এনকাউণ্টাৰ কেছৰ ভুক্তভোগীৰ শপতনামা দাখিল কৰা হৈছে য’ত তিনিজন ব্যক্তি (দীপজ্যোতি, মনোজ, বিশ্বনাথ) আৰক্ষীৰ গুলীচালনাত আহত হৈছিল। শপতনামাত এনকাউণ্টাৰৰ বলি হোৱা লোকসকলৰ বৰ্ণনা আছে য’ত তেওঁলোকে এই এনকাউণ্টাৰটো ভুৱা বুলি উল্লেখ কৰিছে আৰু ইচ্ছুকভাৱে তদানীন্তন আৰক্ষী অধীক্ষক মৃণাল ডেকা আৰু অন্যান্য আৰক্ষী কৰ্মীয়ে কৰা বুলি উল্লেখ কৰিছে।
ন্যায়াধীশ সূৰ্য কান্তে আজি পুনৰ কয় যে আদালতে আয়োগ গঠন কৰাৰ কথা মনস্থ কৰিছে আৰু আবেদনকাৰী আৰু প্ৰতিবাদী উভয়ৰে পৰা গঠন কৰিবলগীয়া কমিটিৰ অৱসৰপ্ৰাপ্ত ন্যায়াধীশৰ নাম বিচাৰে৷
যেতিয়া অসমৰ ৰাজ্যিক জ্যেষ্ঠ অতিৰিক্ত মহাধিবক্তা নলিন কোহলীয়ে কয় যে এনকাউণ্টাৰত জড়িত এজনো আৰক্ষী জোৱানক পদোন্নতি দিয়া হোৱা নাই তেতিয়া ন্যায়াধীশ উজ্জল ভূঞাই কয় যে- ইমানবোৰ অভিযুক্তই নিজৰ প্ৰাণ এনেকৈয়ে হেৰুৱাইছে আৰু এনে ঘটনা আইনৰ শাসনৰ বিৰুদ্ধ৷
ৰাজ্যিক অধিবক্তাই কয় যে আদালতৰ নিৰ্দেশ অনুসৰি আজি শপতনামা দাখিল কৰাৰ প্ৰক্ৰিয়া চলি আছে৷ দুয়োপক্ষৰ শুনানিৰ পাছত আদালতে বিষয়টো ২২ অক্টোবৰলৈ স্থগিত ৰাখে। মন কৰিবলগীয়া যে পূৰ্বে যোৱা দুটা তাৰিখত শপতনামা চৰকাৰে দাখিল কৰা নাছিল৷
আজিৰ শুনানিত আবেদনকাৰীৰ অধিবক্তা আৰিফ জৱাদাৰৰ হৈ উপস্থিত হয় অধিবক্তা আৰু নাগৰিক অধিকাৰ কৰ্মী প্ৰশান্ত ভূষণ।
