নিজৰ ৰাজ্যৰ বিশ্ববিখ্যাত তিৰুপতি ভেংকটেশ্বৰ মন্দিৰৰ প্ৰসাদৰ লাড়ুত ‘বিশুদ্ধ’ ঘিউৰ লগত জন্তুৰ চৰ্বি মিহলি হৈ আছে! অন্ধ্ৰ প্ৰদেশৰ মুখ্যমন্ত্ৰী তথা তেলেগু দেশম পাৰ্টিৰ মুৰব্বী চন্দ্ৰবাবু নাইডুৱে এই চাঞ্চল্যকৰ অভিযোগ উত্থাপন কৰিছে!
অমৰাৱতীত অন্ধ্ৰ বিধানসভাৰ এন ডি এ (য’ত বিজেপি আৰু টিডিপিৰ লগতে অভিনেতা পৱন কল্যাণৰ জনসেনা পাৰ্টিও অন্তৰ্ভুক্ত) বিধায়কৰ বৈঠকত তেওঁ কয় যে “ৱাই এছ আৰ কংগ্ৰেছ চৰকাৰৰ দিনত তিৰুপতী মন্দিৰৰ প্ৰসাদৰ লাডুবোৰ নীচ সামগ্ৰীৰে তৈয়াৰ কৰা হৈছিল৷ আনকি জন্তুৰ চৰ্বিও ঘিউৰ সলনি ব্যৱহাৰ কৰা হৈছিল!”
তিৰুপতিৰ ভেংকটেশ্বৰ মন্দিৰত প্ৰসাদ হিচাপে এটা বিশেষ ‘শ্ৰীবৰী লাড্ডু’ ব্যৱহাৰ কৰা হয়। তিৰুপতী মন্দিৰ পৰিচালনা আৰু ৰক্ষণাবেক্ষণৰ দায়িত্বত থকা তিৰুমালা তিৰুপতি দেৱস্থানম (টিটিডি) কৰ্তৃপক্ষইও প্ৰতিদিনে বিশ্বৰ বিভিন্ন প্ৰান্তৰ ভক্তসকললৈ প্ৰেৰণ কৰাৰ ব্যৱস্থা কৰে। যোৱা জানুৱাৰী মাহত অযোধ্যাত ৰাম মন্দিৰৰ উদ্বোধনী অনুষ্ঠানতো ‘বিশেষ প্ৰসাদ’ হিচাপে অনা হৈছিল তিৰুপতি মন্দিৰৰ লাড়ু।
চন্দ্ৰবাবুৰ লগতে তেওঁৰ পুত্ৰ তথা অন্ধ্ৰ আই টি মন্ত্ৰীয়েও লাড়ুত জন্তুৰ চৰ্বি যোগ কৰাৰ অভিযোগ উত্থাপন কৰিছে। এক্স পোষ্টত তেওঁ লিখিছে, “তিৰুমালাৰ ভগৱান ভেংকটেশ্বৰ স্বামী মন্দিৰ আমাৰ আটাইতকৈ পবিত্ৰ মন্দিৰ। ৱাই এছ জগনমোহন ৰেড্ডীৰ প্ৰশাসনে তিৰুপতি প্ৰসাদত ঘিউৰ সলনি পশুৰ চৰ্বি ব্যৱহাৰ কৰা বুলি জানি মই স্তম্ভিত হৈছোঁ।” ইপিনে ৱাই এছ আৰ পাৰ্টিৰ সাংসদ চুব্বা ৰেড্ডীয়ে কয়, “চন্দ্ৰবাবুৱে লেতেৰা ৰাজনীতি কৰিছে। তেওঁ ভগৱান ভেংকটেশ্বৰ স্বামীৰ কোটি কোটি ভক্তৰ আৱেগক আঘাত কৰিছে।”
