দুদিনীয়া ধাৰাসাৰ বৰষুণৰ ফলত মৰক্কোৰ দক্ষিণ-পূব অঞ্চলৰ চাহাৰা মৰুভূমি বানত বুৰ যায়।
বতৰ বিজ্ঞানীসকলে কয় যে বিগত ৫০ বছৰত এই অঞ্চলটোত ইমান কম সময়ৰ ভিতৰত ইমান বৰষুণ দেখা পোৱা নাই।
মৰক্কোত বাৰ্ষিক গড় বৰষুণৰ পৰিমাণ ২৫০ মিলিমিটাৰতকৈ কম। কিন্তু ছেপ্টেম্বৰ মাহত দুদিনত হোৱা বৰষুণৰ পৰিমাণে দক্ষিণ-পূব মৰক্কোৰ কেইবাঠাইতো বাৰ্ষিক গড় অতিক্ৰম কৰে।
মৰক্কোৰ বতৰ বিজ্ঞান বিভাগৰ বিষয়াসকলৰ মতে, ৰাজধানী ৰাবাটৰ পৰা ৪৫০ কিলোমিটাৰ দূৰত্বত অৱস্থিত টিয়াগুনিটে গাঁৱত ছেপ্টেম্বৰ মাহৰ এটা দিনত ১০০ মিলিমিটাৰ বৰষুণ হৈছিল। সেয়া হৈছে অভিলেখ সৃষ্টি কৰা বৰষুণ।
নাছাৰ উপগ্ৰহৰ ছবিত দেখা গৈছে যে ৫০ বছৰতকৈও অধিক সময় ধৰি শুকান হৈ থকা জাগোৰা আৰু টাটা অঞ্চলৰ মাজৰ ইৰিকি হ্ৰদ পানীৰে ভৰি পৰিছে।
এই সন্দৰ্ভত মৰক্কোৰ বতৰ বিজ্ঞান বিভাগৰ বিষয়া হুছেইন ইয়াবেবে সংবাদ মাধ্যমৰ জৰিয়তে কয় যে, “যোৱা ৩০ৰ পৰা ৫০ বছৰত ইমান কম সময়ৰ ভিতৰতে ইমান বৰষুণ দেখা নাই।”
দ্য গাৰ্ডিয়ানৰ এক প্ৰতিবেদন অনুসৰি যোৱা মাহত মৰক্কোত হোৱা বানত ১৮ জন লোকে প্ৰাণ হেৰুৱাইছিল।
উত্তৰ, মধ্য আৰু পশ্চিম আফ্ৰিকাত চাহাৰা মৰুভূমিৰ আয়তন ৯০ লাখ বৰ্গ কিলোমিটাৰ। গোলকীয় উষ্ণতা বৃদ্ধিয়ে চৰম বতৰৰ আশংকা বৃদ্ধি কৰিছে। ভৱিষ্যতে বৃহৎ ধুমুহা, বানপানীৰ দৰে কথাবোৰ নিয়মীয়া হ’ব পাৰে বুলি বিজ্ঞানীসকলে সকীয়াই দিছে।
