টোপনি কোনেনো বেয়া পায়? অন্ন বস্ত্ৰ বাসস্থান আৰু মৈথুনৰ লগতে টোপনি মানুহৰ এক নিত্যান্তই জৈৱিক প্ৰয়োজন। দিনটোৰ কামৰ শেষত বা কামৰ মাজত সময় থাকিলেও বহুতে টোপনি মাৰে।
কিন্তু টোপনি মাৰি লাখ লাখ টকা উপাৰ্জন কৰিব পাৰি বুলি কোনে ভাবিব পাৰে? হয়, বেংগালুৰুৰ ইনভেষ্টমেণ্ট বেংকাৰ শৈশৱৰী পাটিল নামৰ যুৱতী গৰাকীয়ে টোপনি মাৰিয়েই লাভ কৰিছে ৯ লাখ টকাৰ পুৰস্কাৰ।
শেহতীয়াকৈ বেংগালুৰুস্থিত ষ্টাৰ্ট আপ ৱেকফিটৰ স্লিপ ইন্টাৰশ্বিপ প্ৰগ্ৰেমৰ তৃতীয় ছিজনত ‘স্লিপ চেম্পিয়ন’ৰ খিতাপ অৰ্জন কৰিছে শৈশৱৰী পাটিলে। প্ৰতিযোগিতাখনৰ বাবে নিৰ্বাচিত হোৱা ১২ গৰাকী ‘স্লিপ ইন্টাৰ্ণ’ৰ ভিতৰত তেওঁ অন্যতম। এই প্ৰতিযোগিতাৰ নিয়ম হ’ল দিনটোত ২০ মিনিট আৰু প্ৰতি নিশা আঠৰ পৰা ন ঘণ্টা টোপনি।
প্ৰতিযোগিতাৰ সময়ত প্ৰতিজন অংশগ্ৰহণকাৰীক তেওঁলোকৰ টোপনিৰ মান পৰীক্ষা আৰু উন্নত কৰাৰ বাবে প্ৰিমিয়াম মেট্ৰেছ আৰু টোপনিৰ ট্ৰেকাৰ দিয়া হৈছিল। অংশগ্ৰহণকাৰীসকলে টোপনি বিশেষজ্ঞৰ নেতৃত্বত অনুষ্ঠিত প্ৰতিযোগিতাত অংশগ্ৰহণ কৰি নিজৰ টোপনিৰ অভ্যাস উন্নত কৰি ‘টোপনি চেম্পিয়ন’ৰ খিতাপ লাভ কৰে।
এই প্ৰতিযোগিতাৰ তিনিটা ছিজনত ১০ লাখতকৈ অধিক লোকে আবেদন কৰিছে আৰু ৫১ জন ইন্টাৰ্ণ নিযুক্তি দিয়া হৈছে।
প্ৰতিটো ছিজনত প্ৰতিযোগীসকলক পুৰস্কাৰ হিচাপে দিয়া হৈছে মুঠ ৬৩ লাখ টকা।
ৱেকফিটৰ গ্ৰেট ইণ্ডিয়ান স্লিপ স্ক’ৰকাৰ্ডৰ ২০২৪ চনৰ সংস্কৰণ অনুসৰি প্ৰায় ৫০ শতাংশ প্ৰতিযোগীয়ে ভাগৰুৱা অনুভৱ কৰি সাৰ পায়। পৰ্যাপ্ত পৰিমাণে টোপনি নোপোৱাৰ সাধাৰণ কাৰণসমূহৰ কাৰণ হ’ল দীঘলীয়া সময় কাম কৰা, শোৱাৰ উপযুক্ত পৰিৱেশৰ অভাৱ, মানসিক চাপ ইত্যাদি।
বঁটা বিজয়ী পাটিলে কয়, ‘কোভিদে মোৰ টোপনিৰ ৰুটিনত ব্যাঘাত জন্মাইছিল। এই ইন্টাৰশ্বিপটোৱে মোক অনুশাসিতভাৱে শুবলৈ শিকাইছিল। কিন্তু ফাইনেলৰ দিনটোত মই শান্ত হোৱাৰ ওপৰত গুৰুত্ব দিলোঁ। মই যিকোনো ঠাইতে শুব পাৰো। আনকি বাইকতো। মোৰ এজন বন্ধু আৰু মই ইয়াত কেৱল মজাৰ বাবেই আবেদন কৰিছিলো। গোটেই ইন্টাৰশ্বিপটোত মই শিকিলোঁ যে শৰীৰ, ৰোগ প্ৰতিৰোধ ক্ষমতা বজাই ৰখা আৰু মনৰ পৰা চিন্তাবোৰ আঁতৰ কৰাৰ বাবে গভীৰ টোপনি অতি প্ৰয়োজনীয়।”
