ছবি-কবিতা-সংগীতলৈ ভয় কৰে শাসনাধীন বিজেপি চৰকাৰে। চৰকাৰৰ জনবিৰোধী বা প্ৰকৃতিবিৰোধী সিদ্ধান্তৰ বিৰুদ্ধে কোনোবাই হাতত কলম বা ৰং তুলিকা ল’লেই ধৰফৰাবলৈ আৰম্ভ কৰে চৰকাৰখনে। আৰু চিধাই নিক্ষেপ কৰে পোতাশাললৈ।
উৰণ সেতু নিৰ্মাণৰ নামত দীঘলী পুখুৰীৰ পাৰৰ আৰু ভৰলুমুখৰ পুৰণিকলীয়া গছবোৰ কাটি পেলোৱাৰ সিদ্ধান্ত গ্ৰহণ কৰিছিল হিমন্ত বিশ্ব শৰ্মা নেতৃত্বাধীন বিজেপি চৰকাৰে। সেই সিদ্ধান্তৰ বিৰুদ্ধেই ওলাই আহিছিল অসমৰ শিল্পী-সাহিত্যিক সমাজৰ লগতে গুৱাহাটীৰ প্ৰকৃতিপ্ৰেমী সকল। চৰকাৰৰ এই প্ৰকৃতিবিৰোধী সিদ্ধান্তৰ প্ৰতিবাদ কৰিবলৈ হাতত ৰং তুলিকা লৈ এখন ছবি আঁকিছিল যুৱ চিত্ৰশিল্পী মাৰ্শ্বেল বৰুৱাই। চৰকাৰৰ এই সিদ্ধান্তৰ বিৰোধিতাৰে এখন ছবি অংকন কৰি চৰকাৰক গছবোৰ নাকাটিবলৈ আহ্বান জনাইছিল মাৰ্শ্বেল বৰুৱাই। সেয়াই আছিল অপৰাধ। অপৰাধৰ শাস্তি – জামিনবিহীন গোচৰ আৰু চিধাই বন্দীশাল।
দেওবাৰে পুৱতি নিশা অসম আৰক্ষীয়ে ধৰি লৈ যায় মাৰ্শ্বেল বৰুৱা আৰু মাৰ্শ্বেলৰ সতীৰ্থ অংকুমান বৰদলৈ আৰু কিশোৰ বৰুৱাক। দেওবাৰে গোটেই দিনটো ভৰলুমুখ থানাতে বন্দী কৰি ৰাখে তিনিওকে। আৰক্ষীয়ে কিশোৰ বৰুৱাক সেইদিনাই এৰি দিয়ে যদিও মাৰ্শ্বেল আৰু অংকুমানক থানাতে বন্দী কৰি থয় আৰু সোমবাৰে পুৱা ভাৰতীয় ন্যায় সংহিতাৰ ৮৯(২)/১৮৯(৩)/১৯২/ ২২৪/২৭০/৩৫১(৩)/৩৫২/৩৫৩(২) আৰু ৩পিডিপিপি ধাৰাত গোচৰত ৰুজু কৰি গ্ৰেপ্তাৰ কৰি কাৰাগাৰলৈ প্ৰেৰণ কৰে। উল্লেখ্য যে ইয়াৰে ৩৫১(৩) ধাৰা হৈছে হত্যাৰ ষড়যন্ত্ৰৰ আৰু ৩পিডিপিপি ধাৰা হৈছে ৰাজহুৱা সম্পত্তি বিনষ্ট কৰাৰ। দুইটাই জামিনবিহীন ধাৰা।
এই অন্যায় আৰু আক্ৰোশমূলক শাস্তিক ধিক্কাৰ জনোৱাৰ লগতে মাৰ্শ্বেল আৰু অংকুমানৰ মুক্তিৰ দাবীত আজি গুৱাহাটীৰ দীঘলীপুখুৰীৰ পাৰত মাৰ্শ্বেল বৰুৱাই অকা এখন ছবিৰ তলত শিল্পী-সাহিত্যিক সমাজে এক প্ৰতিবাদী কাৰ্যসূচী গ্ৰহণ কৰে। এই প্ৰতিবাদী কাৰ্যসূচীত উপস্থিত থাকে এছ এফ আই, ডি ৱাই এফ আই, চি পি আই(এম), চি পি আ, ছাত্ৰমুক্তি সংগ্ৰাম সমিতি আৰু ৰাইজৰ দলকে ধৰি কেইবাটাও সংগঠনৰ প্ৰতিনিধি উপস্থিত থাকে। শতাধিক লোক সমবেত হৈ গছৰ কটাৰ বিৰোধিতা কৰাৰ লগতে মাৰ্শ্বেল বৰুৱা আৰু অংকুমান বৰদলৈক মুকলি কৰি দিয়াৰ দাবী জনায়।
আজিৰ এই প্ৰতিবাদী কাৰ্যসূচীত উপস্থিত থাকে অসমৰ স্বনামধন্য কবি নীলিম কুমাৰ, নাট্যকাৰ হিমাংশু প্ৰসাদ দাস, চিত্ৰশিল্পী নিখিলেখ বৰুৱা, তৰুণ কবি চাহিদুল ইছলাম, তৰুণ কবি কোকিল শইকীয়া, কন্ঠশিল্পী নয়নজ্যোতী নাথ, তৰুণ গল্পকাৰ সৃঞ্জনা শৰ্মা, তৰুণ গায়ক তথা আবৃত্তিকাৰ আলোক নৰহ, অধিবক্তা কৃষ্ণ গগৈ, জ্যেষ্ঠ সাংবাদিক তথা লেখক মহেশ ডেকাকে ধৰি কেইবাজনো গণ্যমান্য ব্যক্তি উপস্থিত থাকে।
লগতে, এই কাৰ্যসূচীত এছ এফ আইক প্ৰতিনিধিত্ব কৰি সংগীতা দাস, উৎপলা দাস, ৰাজদ্বীপ মহন্ত, অনুজা ডেকা আদি, ছাত্ৰ মু্ক্তি সংগ্ৰাম সমিতিক প্ৰতিনিধিত্ব কৰি ধনজিৎ বৈশ্য, গৌতম প্ৰতীম গগৈ, চিপিআইক প্ৰতিনিধিত্ব কৰি জয়ন্ত গগৈৰ লগতে বিভিন্ন দল সংগঠনৰ প্ৰতিনিধি উপস্থিত থাকে।
এই কাৰ্যসূচীত সকলো হিমন্ত বিশ্ব শৰ্মাৰ চৰকাৰখনক ধিক্কাৰ জনোৱাৰ লগতে মাৰ্শ্বেল আৰু অংকুমানক মুকলি দিয়াৰ দাবী জনাই ধৰ্ণা প্ৰদান কৰে। লগতে এই শিল্পৰ স্বাধীনতাক বাকৰুদ্ধ কৰাৰ চেষ্টা কৰাৰ প্ৰতিবাদস্বৰূপে প্ৰতিবাদস্থলীত নীলিম কুমাৰ, হিমাংশু প্ৰসাদ দাস, কোকিল শইকীয়া আৰু চাহিদুল ইছলামে প্ৰতিবাদী কবিতা পাঠ কৰে।
শীঘ্ৰেই মাৰ্শ্বেল আৰু অংকুমানক মুকলি কৰি দিয়াৰ লগতে গছ কটা বন্ধ নকৰিলে এই প্ৰতিবাদ অব্যাহত থাকিব বুলি দল সংগঠনৰ প্ৰতিনিধি সকল আৰু শিল্পী সমাজে বিজেপি চৰকাৰক হুংকাৰ দিয়ে।
