অসমৰ ছটা জনগোষ্ঠী– টাই-আহোম, কোচ-ৰাজবংশী, আদিবাসী-চাহ জনগোষ্ঠী, চুতীয়া,মৰাণ আৰু মটকসকলক অনুসূচীকৰণৰ প্রতিশ্রুতি দি বিজেপি চৰকাৰে যিধৰণে প্রতাৰণা কৰি আছে তাৰ বিৰুদ্ধে অসমত পুনৰ প্ৰতিবাদৰ দাবানল দেখিবলৈ পোৱা গৈছে।
কালি বিশেষকৈ ডিব্ৰুগড় আৰু তিনিচুকীয়া জিলাত মৰাণ আৰু মটক জনগোষ্ঠীৰ সংগঠনসমূহে আহ্বান জনোৱা বন্ধৰ কার্যসূচী, যোৰহাটত প্ৰতিবাদী সমাৱেশ আদি হ’ল তাৰেই এক প্রতিফলন। এই ছয় জনগোষ্ঠীক অনুসূচীকৰণৰ প্রতিশ্রুতি দি ২০১৯ চনৰ লোকসভা নির্বাচনৰ পূর্বে ৰাজ্যসভাত বিজেপি চৰকাৰে এখন বিধেয়ক উত্থাপন কৰিছিল। কিন্তু সেই বিধেয়কখন গ্রহণ কৰাৰ পৰিৱর্তে খুঁটি-নাটি পৰামর্শ দিয়াৰ বাবে এটা মন্ত্রীগোট (Group of Ministers) গঠন কৰি ‘মডেলিটী’ দাঙি ধৰাৰহে ব্যবস্থা কৰা হয়।
হিমন্ত বিশ্ব শর্মাৰ নেতৃত্বত গঠিত মন্ত্রীগোটে ছমাহৰ ভিতৰত মডেলিটী জমা দিয়াৰ প্রতিশ্রুতি দিছিল। কিন্তু পাঁচবছৰ অতিক্রম কৰাৰ পাছতো সেই প্রক্রিয়া সম্পূর্ণ নহ’ল। এতিয়া বিজেপি চৰকাৰে বাগাড়ম্বৰ কৰি সময় অতিবাহিত কৰি গৈছে। বিভিন্ন জাতি-জনগোষ্ঠীৰ ভোট আদায়ৰ বাবে বাৰে বৰণীয়া প্ৰতিশ্ৰুতি দি মূৰত আঁভুৱা ভাৰাৰ ই
এক জ্বলন্ত উদাহৰণ।
চিপি আই (এম)ৰ অসম ৰাজ্যিক কমিটিয়ে ছয় জনগোষ্ঠীৰ অনুসূচীকৰণৰ দাবীৰ প্রতি পূৰ্ণ সমৰ্থন জ্ঞাপন কৰাৰ লগতে শীঘ্ৰে অনুসূচীকৰণ প্ৰক্ৰিয়া সম্পূৰ্ণ কৰিবলৈ চৰকাৰৰ ওচৰত দাবী জনাইছে।
চিপিআই(এম)ৰ সুচিন্তিত অভিমত হ’ল, বৰ্তমানে থকা অনুসূচিত জাতি -জনজাতিৰ সা-সুবিধা অক্ষুণ্ণ ৰাখি ছয় জনগোষ্ঠীৰ অনুসূচিতকৰণৰ ব্যৱস্থা কৰা উচিত।
