কালি ১৫ নবেম্বৰ তাৰিখে গুৱাহাটীৰ ফাঁচী বজাৰ এলেকাত খাদ্য ডেলিভাৰি কামৰ সৈতে জড়িত জ্ঞানদ্বীপ হাজৰিকা নামৰ এগৰাকী নিৰীহ যুৱকক এগৰাকী আৰক্ষী বিষয়াই যি বৰ্বৰতা প্ৰদৰ্শন কৰিলে তাত স্তম্ভিত হৈ পৰিছে ভাৰতৰ গণতান্ত্ৰিক যুৱ ফেডাৰেছন চমুকৈ ডি ৱাই এফ আইৰ অসম ৰাজ্যিক কমিটি।
এই ঘটনাক কঠোৰ ভাষাৰে নিন্দা কৰি এনে নিন্দনীয় কাৰ্যত জড়িত বিষয়াৰ বিৰুদ্ধে কঠোৰ শাস্তিমূলক ব্যৱস্থা গ্ৰহণ কৰিবলৈ দাবী জনাইছে।
পাণবজাৰ থানাৰ ভাৰপ্ৰাপ্ত আৰক্ষী বিষয়া ভাৰ্গব বৰবৰাই যুৱকজনক নিৰ্দয় আচৰণ কৰাৰ লগতে অকথ্য শাৰীৰিক নিৰ্যাতন কৰি হত্যা কৰাৰ ভাবুকি দিয়ে।
ডি ৱাই এফ আইৰ স্পষ্ট অভিমত, কেৱল নিলম্বনেই শেষ শাস্তি নহয়, শান্তি-শৃংখলা ৰক্ষাৰ দায়িত্বত থকা আৰক্ষীয়ে কৰা এনে সন্ত্ৰাস আৰু বৰ্বৰতাৰ বিৰুদ্ধে কঠোৰ আৰু দৃষ্টান্তমূলক শাস্তি দিয়া প্ৰয়োজন। মুখ্যমন্ত্ৰী প্ৰত্যক্ষ অধীনত থকা গৃহ বিভাগৰ এগৰাকী আৰক্ষীয়ে এনে আইন বিৰুদ্ধ ঘটনা সংঘটিত কৰা কাৰ্যই ৰাজ্যৰ আইন-শৃংখলাৰ অৱনতিৰ দিশটোক স্পষ্ট কৰিছে। মুখ্যমন্ত্ৰীৰ এনকাউণ্টাৰ সংস্কৃতিৰে এয়া এক সংস্কৰণ বুলিও ডি ৱাই এফ আইয়ে অভিযোগ কৰিছে।
পাণবজাৰ থানাৰ ভাৰপ্ৰাপ্ত বিষয়া ভাৰ্গব বৰবৰাই নিশাৰ ভাগত সামান্য কথাতে বৰ্বৰভাৱে আক্ৰমণ কৰে। আৰক্ষীৰ এনে আচৰণে দল-সংগঠনৰ লগতে সাধাৰণ জনতা স্তম্ভিত কৰি তুলিছে।
উল্লেখযোগ্য যে এই জন আৰক্ষী বিষয়াই যোৱা ৩০ অক্টোবৰ তাৰিখেও দীঘলীপুখুৰী পাৰত গছ ৰক্ষাৰ দাবীত কটন বিশ্ববিদ্যালয়কে ধৰি বিদ্যালয়-মহাবিদ্যালয়ৰ একাংশ সচেতন ছাত্ৰ-ছাত্ৰীয়ে উলিওৱা সমদলৰ ওপৰতো বৰ্বৰতা প্ৰকাশ কৰিছিল।
ভাৰতৰ গণতান্ত্ৰিক যুৱ ফেডাৰেছন চমুকৈ ডি ৱাই এফ আইৰ অসম ৰাজ্যিক কমিটিয়ে এই ঘটনাক গুৰুতৰ মানৱ অধিকৰ উলংঘন হিচাপে অভিহিত কৰি ইয়াৰ বিৰুদ্ধে গোৰ ৰুজু কৰি কঠোৰ ব্যৱস্থা গ্ৰহণৰ দাবীত ৰাজ্যিক মানৱ অধিকাৰ আয়োগলৈ স্মাৰক পত্ৰ প্ৰেৰণ কৰিছে।
আৰক্ষীৰ দ্বাৰা মানৱ অধিকাৰ লংঙ্ঘনৰ ঘটনা শেহতীয়াকৈ দ্ৰুতগতি বৃদ্ধি পাব ধৰিছে। সেয়ে এই বিষয়ত হস্তক্ষেপ কৰি জনসাধাৰণক ন্যায়াৰ শাসন প্ৰতিষ্ঠাৰ স্বাৰ্থতে ডি ৱাই এফ আইয়ে মানৱ অধিকাৰ আয়োগলৈ স্মাৰক পত্ৰ প্ৰেৰণ কৰিছে।
