সমগ্ৰ মণিপুৰ জ্বলিছে। আনকি সুৰক্ষিত নহয় মুখ্যমন্ত্ৰীৰ বাসগৃহও। মুখ্যমন্ত্ৰী বীৰেন সিঙৰ বাসগৃহতো চলিছে প্ৰতিবাদকাৰীৰ আক্ৰমণ। এনে পৰিস্থিতিত মণিপুৰৰ বিজেপি চৰকাৰে সেনাৰ বিশেষ ক্ষমতা আইন(AFSPA) প্ৰত্যাহাৰ কৰাৰ দাবী জনাই কেন্দ্ৰীয় চৰকাৰলৈ চিঠি প্ৰেৰণ কৰিছে।
যোৱা ১৪ নৱেম্বৰত কেন্দ্ৰই মণিপুৰৰ ৬ খন থানাত AFSPA কাৰ্যকৰী কৰাৰ বাবে অধিসূচনা জাৰি কৰিছিল।
গৃহ মন্ত্ৰালয়ে জাৰি কৰা এই অধিসূচনা অনুসৰি পশ্চিম ইম্ফলৰ ছেকমাই আৰু লামছাঙ, পূব ইম্ফলৰ লামলাই, বিষ্ণুপুৰৰ মৈৰাং, কাংপোকপিৰ লেইমাখং আৰু জিৰিবাম থানা অঞ্চলত নতুনকৈ AFSPA প্ৰয়োগ কৰা হৈছে।
ইফালে মণিপুৰ চৰকাৰৰ গৃহ বিভাগৰ এগৰাকী উপ-সচিবে দিল্লীৰ গৃহ মন্ত্ৰালয়লৈ পত্ৰ প্ৰেৰণ কৰি এই সিদ্ধান্তৰ পুনৰ বিবেচনাৰ বাবে অনুৰোধ জনাইছে।
পত্ৰখনত কোৱা হৈছে যে ১৫ নৱেম্বৰত ৰাজ্যৰ মন্ত্ৰীসভাই নতুনকৈ AFSPA জাৰি কৰাৰ সিদ্ধান্ত সন্দৰ্ভত আলোচনা কৰিছিল। ৰাজ্যৰ মন্ত্ৰীসভাই AFSPA সম্পূৰ্ণৰূপে প্ৰত্যাহাৰ কৰাটো বিচাৰে। কেন্দ্ৰীয় গৃহ মন্ত্ৰালয়ে পুনৰ বিবেচনা কৰি এই সিদ্ধান্ত প্ৰত্যাহাৰ কৰক। ৰাজ্যৰ সাম্প্ৰতিক পৰিস্থিতিত বিজেপি চৰকাৰৰ এই সিদ্ধান্ত আচৰিত। যদিও বিশেষজ্ঞসকলে ভাবে যে ইয়াৰ আঁৰত যুক্তি আছে। যদি AFSPA স্থাপন হয় তেন্তে সেনাই সম্পূৰ্ণ নিজাববীয়াকৈ কাম কৰিব পাৰে। সেনাবাহিনীৰ ওপৰত ৰাজ্য চৰকাৰৰ কোনো নিয়ন্ত্ৰণ নাথাকে। মণিপুৰৰ ৰাইজৰ মাজত অসন্তুষ্টি দীৰ্ঘদিন ধৰি চলি আহিছে। বীৰেণ সিঙৰ চৰকাৰে অনুভৱ কৰিছে যে এই নবীকৃত AFSPA নতুনকৈ আৰম্ভ হোৱা হিংসাৰ আঁৰৰ কাৰণ হ’ব পাৰে।
