গণহত্যা, মানৱতাৰ বিৰুদ্ধে অপৰাধ! ইজৰাইলৰ প্ৰধানমন্ত্ৰী বেঞ্জামিন নেতানিয়াহুৰ বিৰুদ্ধে এনে অভিযোগ উত্থাপন হৈছে। সেই দেশৰ প্ৰাক্তন প্ৰতিৰক্ষা মন্ত্ৰী ইয়োভ গেলেণ্টৰ বিৰুদ্ধেও একে অভিযোগ উত্থাপন হৈছে। সেই পৰিপ্ৰেক্ষিততে আন্তঃৰাষ্ট্ৰীয় ফৌজদাৰী আদালত বা আইচিচিয়ে তেওঁলোকৰ বিৰুদ্ধে গ্ৰেপ্তাৰী পৰোৱানা জাৰি কৰিছে।
ইজৰাইল-হামাছৰ সংঘাতৰ বিষয়ে নতুনকৈ ক’বলগীয়া নাই। চলি থকা সংঘাতত এতিয়ালৈকে লাখ লাখ সাধাৰণ নাগৰিকে প্ৰাণ হেৰুৱাইছে। গাজা প্ৰায় নিঃশেষ হৈ গৈছে। ইজৰাইলৰ প্ৰধানমন্ত্ৰীয়ে হামাছক নিৰ্মূল কৰিবলৈ আক্ৰমণ বন্ধ নকৰাৰ পণ লৈছে।
তাৰ বাবেই চলিছে বিমান আক্ৰমণ, এতিয়া গাজাত চাৰ্জিকেল ষ্ট্ৰাইক চলি আছে। নেতানিয়াহুৰ বিৰুদ্ধে মূল অভিযোগ যে তেওঁ ‘যুদ্ধ অপৰাধ’ সংঘটিত কৰিছে। তেওঁ নৈতিকতাৰ সকলো সীমা উলংঘা কৰি হত্যা, মৃত্যুদণ্ড দিয়া, মানুহৰ ওপৰত নৰকীয় নিৰ্যাতন, খাবলৈ নিদিয়া আদি অপৰাধ সংঘটিত কৰি আছে।
আন্তঃৰাষ্ট্ৰীয় ফৌজদাৰী আদালতে লগতে বিশ্বাস কৰে যে অভিযুক্ত দুজনে ইচ্ছাকৃতভাৱে গাজাৰ জনসাধাৰণক জীৱন বৰ্তি থকাৰ বাবে প্ৰয়োজনীয় সামগ্ৰীৰ পৰা বঞ্চিত কৰি মৃত্যুৰ মুখলৈ ঠেলি দিবলৈ চেষ্টা কৰিছে। এই কাৰণেই গাজাত অত্যন্ত অমানৱীয় পৰিস্থিতিৰ সৃষ্টি হৈছে। তাৰ বাবে দায়ী বেঞ্জামিন নেতানিয়াহু আৰু ইয়োভ গালাণ্ট। আদালতৰ এই পৰ্যবেক্ষণ ২০২৩ চনৰ ৮ অক্টোবৰৰ পৰা ২০২৪ চনৰ ২০ মে’লৈকে আদালতে লাভ কৰা প্ৰতিবেদনৰ ভিত্তিত কৰা হৈছে।
ন্যায়াধীশগৰাকীয়ে আৰু লক্ষ্য কৰে যে খাদ্য, খোৱাপানী, বিদ্যুৎ আনকি ঔষধো গাজালৈ ইচ্ছামতে প্ৰেৰণ কৰা হোৱা নাই। এইদৰে ইজৰাইলে পোনপটীয়াকৈ হত্যা কৰাৰ পৰিৱৰ্তে গাজাৰ জনসাধাৰণক মৃত্যুৰ মুখলৈ ঠেলি দিছে। প্ৰাপ্তবয়স্ক লোকৰ মৃত্যু হৈছে, শিশুসকলে পুষ্টিহীনতাত ভুগিছে। লগতে বহু লোকৰ মৃত্যু হৈছে।
হামাছে ইজৰাইলক আক্ৰমণ কৰাৰ পিছৰে পৰা ইজৰাইলৰ আক্ৰমণত গাজা কাৰ্যতঃ ধ্বংস হৈছে। নেতানিয়াহুৱে স্পষ্ট বাৰ্তা দিছে কৈছে যে ইজৰাইল আৰু ইয়াৰ নাগৰিকৰ বিৰুদ্ধে হামাছে যুদ্ধ আৰম্ভ কৰিছে। তেওঁলোকে প্ৰথমে আক্ৰমণ কৰিছিল। শত্ৰুৱে কল্পনা কৰিব নোৱাৰা মূল্য ল’ব লাগিব।
ইয়াৰ পূৰ্বে ভাৰত, আমেৰিকাকে ধৰি কেইবাখনো দেশে তেওঁক যুদ্ধ বন্ধ কৰিবলৈ অনুৰোধ জনাইছিল। কিন্তু নেতানিয়াহুৱে কাৰো কথাৰ প্ৰতি কোনো গুৰুত্ব নিদিলে। এইবাৰ আন্তঃৰাষ্ট্ৰীয় ফৌজদাৰী আদালতৰ সিদ্ধান্তক লৈ তেওঁ কি প্ৰতিক্ৰিয়া দিয়ে সেয়া লক্ষ্যণীয় হৈ পৰিছে।
