ক্ৰিকেট খেলি থকাৰ সময়ত খেলপথাৰতে মৃত্যু ঘটে ক্ৰিকেটাৰগৰাকীৰ। পুনেত সংঘটিত হৈছে এই কৰুণ ঘটনা। জানিব পৰা মতে খেল চলি থকাৰ সময়তে ইমৰাণ পেটেল নামৰ ক্ৰিকেটাৰগৰাকী হাৰ্ট এটেকত আক্ৰান্ত হৈছিল। হস্পিতাললৈ লৈ যাবলৈ সময়কনো পোৱা নগ’ল। খেলপথাৰতে মৃত্যু হয় ইমৰাণৰ।
জানিব পৰা মতে, বৃহস্পতিবাৰে পুনেৰ গড়ৱাৰ ষ্টেডিয়ামত দুটা দলৰ মাজত খেল চলিছিল। ৩৫ বছৰীয়া ইমৰানেও তাত খেলি আছিল। তেওঁ অল ৰাউণ্ডাৰ হিচাপে খেলে। তেওঁ বেটিং কৰিবলৈ নামি ইনিংছৰ মাজতে এটা বাউণ্ডেৰী মাৰে। ইয়াৰ পিছত দেখা যায় যে ইমৰানে অস্বস্তি অনুভৱ কৰিছে। তেওঁ আম্পায়াৰক কয় যে তেওঁৰ হাত আৰু বুকুত বিষ হৈছে।
পৰিস্থিতি দেখি আম্পায়াৰে ইমৰাণক খেলপথাৰৰ বাহিৰলৈ গৈ জিৰণি ল’বলৈ কয়। কিন্তু খেলপথাৰ এৰি যোৱাৰ সময়তে ইমৰাণ হঠাতে ঢলি পৰিল। লগে লগে ক্ৰিকেটাৰসকলে ইমৰাণৰ ওচৰলৈ দৌৰি গ’ল। তেওঁক চিকিৎসালয়লৈ লৈ যোৱা হয়। যিহেতু মেচখন লাইভ সম্প্ৰচাৰ হৈ আছিল, সেয়ে, সমগ্ৰ ঘটনাটো কেমেৰাত ধৰা পৰে। ইমৰাণৰ মৃত্যুৰ ভিডিঅ’ ভাইৰেল হৈছে।
চিকিৎসালয়লৈ নিয়াৰ সময়ত চিকিৎসকে ইমৰানক মৃত বুলি ঘোষণা কৰে। মৃত্যুৰ কাৰণ হিচাপে ইমৰাণৰ হঠাৎ হাৰ্ট এটেকত মৃত্যু হয়। কিন্তু তেওঁৰ সতীৰ্থ নাছেৰ খানে কয় যে ইমৰাণৰ কোনো শাৰীৰিক অসুস্থতা নাছিল। ইয়াৰ পিছতো ক্ৰিকেটাৰগৰাকীৰ হাৰ্ট এটেক কেনেকৈ হ’ল কোনেও বুজিব পৰা নাই। সতীৰ্থৰ এনে পৰিণতিত শোকস্তব্ধ হৈ পৰিছে ক্ৰিকেটাৰসকল।
জানিব পৰা গৈছে যে ইমৰাণৰ তিনিগৰাকী কন্যা সন্তান আছে। মাত্ৰ চাৰি মাহ আগতে তেওঁৰ তৃতীয় কন্যা সন্তানৰ জন্ম হৈছিল। ক্ৰিকেট খেলাৰ উপৰিও ইমৰাণৰ এখন জুচৰ দোকানো আছিল। ক্ৰিকেটাৰগৰাকীৰ এনে ঘটনাৰ খবৰ শুনি সকলোৱে স্তম্ভিত হৈ পৰে।
