কেন্দ্ৰীয় পৰিবেশ, বন আৰু জলবায়ু পৰিবৰ্তন মন্ত্ৰী ভূপেন্দ্ৰ যাদৱে বৃহস্পতিবাৰে (৫ ডিচেম্বৰ) ৰাজ্যসভাত এক প্ৰশ্নৰ উত্তৰত কয় যে ছত্তিশগড়ৰ হাছদেৱ বনাঞ্চলৰ পাৰ্ছা পূৱ কেটে বাসান (পিইকেবি) খনিত ৯৪,৪৬০ টা গছ কটা হৈছে।
সংসদত যাদৱে কয়, ‘২০২৪ চনৰ জুলাই মাহত ছত্তীশগড় চৰকাৰৰ পৰা পোৱা তথ্য অনুসৰি পাৰ্ছা পূৱ কেটে বাসন খনিত ৯৪,৪৬০ টা গছ কটা হৈছে আৰু ক্ষতিপূৰণমূলক বনানীকৰণ, খনি পুনৰুদ্ধাৰ আৰু স্থানান্তৰৰ বাবে ৫৩,৪০,৫৮৬ টা গছ ৰোপণ কৰা হৈছে।’ ইয়াৰ উপৰিও ৰাজ্যখনে জনাইছে যে আগন্তুক বছৰবোৰত এই অৰণ্যত ২,৭৩,৭৫৭ টা গছ কাটি খনন কৰাৰ পৰিকল্পনা আছে।
ভাৰতীয় কমিউনিষ্ট পাৰ্টীৰ সাংসদ পি পি সুনিৰে পিইকেবি এলেকাত খনন সন্দৰ্ভত ভাৰতীয় বন্যপ্ৰাণী প্ৰতিষ্ঠানে দিয়া পৰামৰ্শ সন্দৰ্ভত এক প্ৰশ্নৰ উত্তৰত মন্ত্ৰীগৰাকীয়ে এই উত্তৰ দিয়ে।
উল্লেখ্য যে, হাছদেৱ অৰণ্য হৈছে ১৫০০ কিলোমিটাৰ এলেকাত বিস্তৃত ঘন অৰণ্য, যিখন ছত্তীশগড়ৰ জনজাতীয় লোকৰ বাসস্থান। আনুমানিক পাঁচ বিলিয়ন টন কয়লা এই ঘন অৰণ্যৰ তলত পুতি থোৱা আছে। অঞ্চলটোত খনন ব্যৱসায় এটা ডাঙৰ ব্যৱসায়ত পৰিণত হৈছে, যাৰ বিৰোধিতা কৰিছে স্থানীয় ৰাইজে।
কয়লা মন্ত্ৰালয় আৰু পৰিৱেশ আৰু জল মন্ত্ৰালয়ৰ যৌথ গৱেষণাৰ ভিত্তিত ২০১০ চনত হাছদেৱ অৰণ্য বনাঞ্চলখনক সম্পূৰ্ণ ‘ন’ গ’ এৰিয়া’ হিচাপে ঘোষণা কৰা হৈছিল। কিন্তু কেইমাহমানৰ ভিতৰতে এই সিদ্ধান্ত বাতিল কৰি প্ৰথম পৰ্যায়ৰ খননৰ অনুমোদন লাভ কৰে। ২০১৩ চনৰ পাছৰ ফালে খনন আৰম্ভ হয়।
স্মৰ্তব্য যে, ছত্তীশগড়ত বিজেপি ক্ষমতালৈ অহাৰ লগে লগে, যোৱা বছৰৰ ডিচেম্বৰ মাহত হাছদেৱ অৰণ্য অঞ্চলত পাৰ্ছা পূৱ আৰু কেটে বাসনৰ (পিইকেবি) দ্বিতীয় পৰ্যায়ৰ সম্প্ৰসাৰণ কয়লা খনিৰ বাবে গছ কটা আৰম্ভ হৈছিল।
