শনিবাৰে ৰাজ্যৰ মুখ্যমন্ত্ৰী হিমন্ত বিশ্ব শৰ্মা নেতৃত্বাধীন ৰাজ্যিক মন্ত্ৰীসভাত চাৰিজন নতুন মন্ত্ৰীয়ে শপত গ্ৰহণ কৰে।
এই সম্প্ৰসাৰণৰ ফলত মন্ত্ৰীপৰিষদৰ মুঠ মন্ত্ৰীৰ সংখ্যা ১৮ জনলৈ বৃদ্ধি পাইছে।
অৱশ্যে কেবিনেটত এতিয়াও আন এক সালসলনি দেখা যাব পাৰে যিটো অতি সোনকালে হ’ব বুলি আশা কৰা হৈছে।
নতুন মন্ত্ৰীসকলৰ ভিতৰত আছে ডিব্ৰুগড়ৰ বিধায়ক প্ৰশান্ত ফুকন, লক্ষীপুৰৰ বিধায়ক কৌশিক ৰায়, পাথাৰকান্দিৰ বিধায়ক কৃষ্ণেন্দু পাল আৰু ডুমডুমাৰ বিধায়ক ৰূপেশ গোৱালা।
অৱশ্যে নতুনকৈ নিযুক্তি পোৱা মন্ত্ৰীকেইজনৰ দায়িত্বপ্ৰাপ্ত বিভাগসমূহ ঘোষণা কৰা হোৱা নাই।
গুৱাহাটীৰ শ্ৰীমন্ত শংকৰদেৱ কলাক্ষেত্ৰত অনুষ্ঠিত এক অনুষ্ঠানত নতুন মন্ত্ৰীসকলে শপত গ্ৰহণ কৰে। অনুষ্ঠানত অসম চৰকাৰৰ জ্যেষ্ঠ বিষয়া আৰু দলৰ নেতাসকলে অংশগ্ৰহণ কৰে।
ৰাজ্যৰ চাহ জনজাতি আৰু শ্ৰমিক কল্যাণ মন্ত্ৰী সঞ্জয় কিষানে বৃহস্পতিবাৰে পদত্যাগ পত্ৰ দিয়াৰ পিছতে কেবিনেট সম্প্ৰসাৰণ কৰা হয়।
তিনিচুকীয়াৰ বিধায়ক ৫৪ বছৰীয়া কিষাণে ইয়াৰ পূৰ্বে প্ৰাক্তন মুখ্যমন্ত্ৰী সৰ্বানন্দ সোণোৱালৰ মন্ত্ৰীসভাতো কাৰ্যনিৰ্বাহ কৰিছিল।
