অসমৰ মুখ্যমন্ত্ৰী হিমন্ত বিশ্ব শৰ্মাই বুধবাৰে কয় যে ৰাজ্য চৰকাৰে অসমত আধাৰ কাৰ্ডৰ বাবে আবেদনকাৰীৰ পৰীক্ষণ আৰম্ভ কৰিব আৰু যিসকল আবেদনকাৰীৰ পৰিয়ালে ৰাষ্ট্ৰীয় নাগৰিকপঞ্জীৰ অংশ হ’বলৈ আৱেদন কৰা নাই তেওঁলোকক নাকচ কৰিব।
ইণ্ডিয়ান এক্সপ্ৰেছৰ প্ৰতিবেদন অনুসৰি চলিত বৰ্ষৰ ছেপ্টেম্বৰ মাহত শৰ্মাই এন আৰ চিৰ আবেদনৰ সৈতে আধাৰ কাৰ্ড সংযোগ কৰাৰ সিদ্ধান্ত ঘোষণা কৰিছিল। তেওঁ কৈছিল যে ৰাজ্য চৰকাৰে ভৱিষ্যতে আধাৰ কাৰ্ড প্ৰদানৰ বাবে এটা ষ্টেণ্ডাৰ্ড অপাৰেটিং প্ৰট’কল (এছ অ’ পি) জাৰি কৰাৰ সিদ্ধান্ত লৈছে, যাৰ অধীনত ২০১৫ চনত ইয়াৰ বাবে আবেদন কৰা যিকোনো ব্যক্তিয়ে এন আৰ চিৰ আবেদন নম্বৰ দিয়াটো বাধ্যতামূলক হ’ব।
বুধবাৰে অনুষ্ঠিত বৈঠকৰ অন্তত তেওঁ কয় যে এই সন্দৰ্ভত এছ অ’ পি কাৰ্যকৰী কৰাৰ প্ৰস্তাৱ কেবিনেটে অনুমোদন জনাইছে। তেওঁ কয় যে ৰাজ্য চৰকাৰৰ সাধাৰণ প্ৰশাসন বিভাগেই ইয়াৰ কাৰ্যকৰীকৰণৰ বাবে ন’ডেল এজেন্সী হ’ব, যিটো জিলা পৰ্যায়ত অতিৰিক্ত জিলা উপায়ুক্ত আৰু ৰাজহ সংমণ্ডল পৰ্যায়ত সংমণ্ডল বিষয়াই নিৰীক্ষণ কৰিব।
তেওঁ কয়, ‘যোৱা দুমাহত অসম আৰক্ষী, ত্ৰিপুৰা আৰক্ষী আৰু বি এছ এফে বহু অনুপ্ৰৱেশকাৰীক ধৰিছে। এই কাৰণেই বাংলাদেশৰ পৰা অনুপ্ৰৱেশ আমাৰ বাবে চিন্তাৰ বিষয়। আমি আমাৰ ব্যৱস্থাটো শক্তিশালী কৰিব লাগিব আৰু সেইবাবেই আমি আধাৰ কাৰ্ড ব্যৱস্থাক কঠোৰ কৰাৰ সিদ্ধান্ত লৈছো।’
তেওঁ কয় যে আবেদন কৰাৰ পিছত ইউআইডিএআইয়ে ৰাজ্য চৰকাৰলৈ পৰীক্ষণৰ বাবে প্ৰেৰণ কৰিব, তাৰ পাছত সংশ্লিষ্ট চক্ৰ বিষয়াই আবেদনকাৰী বা তেওঁৰ পৰিয়ালে এনআৰচিত অন্তৰ্ভুক্ত হ’বলৈ আবেদন কৰিছে নে নাই পৰীক্ষা কৰিব।
তেওঁ কয়, ‘এন আৰ চিৰ বাবে আবেদন কৰা বুলি ধৰা পৰিলে উচ্চতম ন্যায়ালয়ৰ নিৰ্দেশ অনুসৰি চক্ৰ বিষয়াগৰাকীয়ে ক্ষেত্ৰ পৰ্যায়ৰ পৰীক্ষণৰ বাবে যাব। বিষয়াগৰাকী সম্পূৰ্ণ পতিয়ন যোৱাৰ পাছত আধাৰ অনুমোদন দিয়া হ’ব।’
২০১৯ চনত ‘চূড়ান্ত এন আৰ চি’ প্রকাশ হোৱাৰ পূৰ্বে এন আৰ চি উন্নীতকৰণৰ প্রক্রিয়া ২০১৫ চনৰ পৰা আৰম্ভ হৈছিল৷ ১৯৭১ চনৰ ২৪ মাৰ্চৰ পূৰ্বে আবেদনকাৰীয়ে ৰাজ্যখনত প্ৰৱেশ কৰিছিল নে নাই সেইটো নিৰ্ণয় কৰিবলৈ এই প্ৰক্ৰিয়া আৰম্ভ কৰা হৈছিল। সেই তাৰিখৰ পূৰ্বে অসমত প্ৰৱেশ কৰা বুলি ধৰা পৰা সকলক এন আৰ চিত অন্তৰ্ভুক্ত কৰি নাগৰিক হিচাপে স্বীকৃতি দিব লাগিছিল। এন আৰ চিৰ পৰা আঁতৰি থকাসকলক ৰাজ্যৰ বিদেশী ন্যায়াধিকৰণ ব্যৱস্থাত বিচাৰৰ সন্মুখীন হ’বলগীয়া হৈছিল।
উল্লেখ্য যে, ২০১৯ চনৰ ৩১ আগষ্টত অসমৰ নাগৰিকৰ চূড়ান্ত তালিকা অৰ্থাৎ আপডেট কৰা এনআৰচি প্ৰকাশ পাইছিল, য’ত ৩১,১২১,০০৪ জন লোকক অন্তৰ্ভুক্ত কৰা হৈছিল, আনহাতে ১,৯০৬,৬৫৭ জন লোকক যোগ্য বুলি গণ্য কৰা হোৱা নাছিল।
