“আমাৰ চৰকাৰে ডেৰ বছৰত প্ৰায় ১০ লাখ চৰকাৰী চাকৰি দিছে। আজিলৈকে আমাৰ দৰে ইমান চাকৰি কোনো চৰকাৰে দিয়া নাই।” ৭১ হাজাৰ নতুন নিয়োগ পত্ৰ প্ৰদান অনুষ্ঠানত প্ৰধানমন্ত্ৰী মোদীয়ে দাবী কৰে যে তেওঁৰ চৰকাৰে গ্ৰাম্য নিয়োগক সৰ্বোচ্চ অগ্ৰাধিকাৰ দিছে। আৰু ভাৰতৰ গ্ৰাম্য অঞ্চলত সৃষ্টি হোৱা সেই কৰ্মসংস্থাপনো বহুমুখী।
কিন্তু বাস্তৱে সেই কথা নকয়। ২০১৪ চনত ক্ষমতালৈ অহাৰ পূৰ্বে মোদী আৰু বিজেপিয়ে বছৰি ২ কোটি চাকৰি দিয়াৰ কথা ঘোষণা কৰি নিৰ্বাচনী প্ৰচাৰ চলাইছিল। সেই প্ৰতিশ্ৰুতি ১০ বছৰতো পূৰণ নহ’ল। ইয়াৰ বিপৰীতে প্ৰথম মোদীৰ কাৰ্যকাল শেষ হোৱাৰ পূৰ্বে খোদ নীতি আয়োগৰ এক প্ৰতিবেদনত প্ৰকাশ পাইছিল যে ভাৰতত বিগত ৪৫ বছৰৰ ভিতৰত নিবনুৱাৰ হাৰ সৰ্বাধিক।
২০২২ চনত চৰকাৰে প্ৰকাশ কৰা আন এক প্ৰতিবেদনত দাবী কৰা হৈছে যে ২০১৪ চনৰ পৰা এই সাত বছৰত ২২ কোটি চাকৰি প্ৰত্যাশীয়ে কেন্দ্ৰীয় চৰকাৰৰ চাকৰিৰ বাবে আবেদন কৰিছিল। ইয়াৰ ভিতৰত মাত্ৰ ৭ লাখ ২২ হাজাৰ লোকেহে নিযুক্তি পত্ৰ লাভ কৰিছে। অৰ্থাৎ বছৰি ২ কোটি চাকৰি দিয়াৰ কথা কোৱা চৰকাৰখনৰ কাৰ্যকালত চাকৰি দিয়া প্ৰৱণতাৰ দ্ৰুত হ্ৰাস পোৱা দেখা গৈছে।
লগতে পঢ়কঃ কেন্দ্ৰীয় চৰকাৰৰ ডাঙৰ ঘোষণা! পঞ্চম আৰু অষ্টম শ্ৰেণীৰ বাবে ঘূৰি আহিল পাছ-ফেইল চিষ্টেম
পৰিসংখ্যা অনুসৰি ২০১৫ চনত ১ লাখ ৩০ হাজাৰ লোকে চৰকাৰী চাকৰি লাভ কৰিছিল। মাত্ৰ দুবছৰত অৰ্থাৎ ২০১৭ চনত সেই সংখ্যা হ্ৰাস পাই মাত্ৰ ৩৮ হাজাৰ হ’ল। পাঁচ বছৰৰ পাছতো পৰিস্থিতিৰ কোনো পৰিৱৰ্তন হোৱা নাই। ২০২২ চনলৈকে চাকৰি দিয়া হৈছে সেই ৩৮ হাজাৰজনকে।
চৰকাৰে বাৰে বাৰে জনাইছে যে কেন্দ্ৰীয় চৰকাৰত মুঠ খালী পদৰ সংখ্যা ৯ লাখ ৭৯ হাজাৰ। বছৰ বছৰ ধৰি বহু কৰ্মচাৰীয়ে অৱসৰ গ্ৰহণ কৰিছে। কিন্তু তাৰ তুলনাত কোনো নিযুক্তি দিয়া নহ’ল। সেয়ে, এই পাহাৰ সমান খালী পদ। ২০২২ চনৰ জুন মাহত প্ৰধানমন্ত্ৰী নৰেন্দ্ৰ মোদীয়ে ঘোষণা কৰিছিল যে, ‘মই ডেৰ বছৰত ১০ লাখ চাকৰি দিম!’, অৰ্থাৎ ২০২৩ চনৰ ডিচেম্বৰৰ আছিল ইয়াৰ সময়সীমা।
ইয়াৰ পিছতে লোকসভা নিৰ্বাচনৰ কথা মনত ৰাখি এক নতুন প্ৰচাৰ আৰম্ভ হয়। প্ৰক্ৰিয়া অনুসৰি যিবোৰ চাকৰি হয় সেই চৰকাৰী চাকৰিবোৰকেই ৰোজগাৰ মেলা নাম দি প্ৰধানমন্ত্ৰীয়ে ভিডিঅ’ কনফাৰেন্সৰ জৰিয়তে নিযুক্তি পত্ৰ বিতৰণ কৰিবলৈ আৰম্ভ কৰে। এইদৰে ২০২২ চনৰ অক্টোবৰৰ পৰা আৰম্ভ হয় ৰোজগাৰ মেলা। আকৌ বিজেপি শাসিত ৰাজ্যসমূহকো ৰাজ্য চৰকাৰৰ চাকৰি এই ৰোজগাৰ মেলাৰ অধীনলৈ আনিবলৈও কোৱা হয়। ২০২৪ চনৰ ফেব্ৰুৱাৰীলৈকে চলে এই আয়োজন।
লগতে পঢ়কঃ বিতৰ্কৰ মুখত পৰি বাদ পৰিল চন্দ্ৰচুড়! ৰাষ্ট্ৰীয় মানৱ অধিকাৰ আয়োগৰ অধ্যক্ষ পদত ভি ৰামসুব্ৰমনিয়ণ
সোমবাৰৰ দিনটোতো ৰোজগাৰ মেলাত ভাৰ্চুৱেলি উপস্থিত আছিল প্ৰধানমন্ত্ৰী মোদী। তাত তেওঁ কয়, এইবাৰ কেন্দ্ৰীয় চৰকাৰে গাঁওসমূহতো কৰ্মসংস্থাপনৰ সুযোগ সৃষ্টি কৰিছে। কিন্তু কেনেকৈ? মোদীয়ে দাবী কৰিছে যে সমগ্ৰ দেশতে গোবৰ্ধন যোজনা আঁচনিত শতাধিক গোবৰ গেছ প্লাণ্ট নিৰ্মাণ কৰা হৈছে। এই প্ৰকল্পটোৱে কেৱল বিদ্যুৎ উৎপাদন কৰাই নহয়, কৰ্মসংস্থাপনৰো সৃষ্টি কৰিছে। ইয়াৰ উপৰি কৃষি বজাৰক ‘ই-নেম’ নামৰ ডিজিটেল প্ৰকল্পৰ সৈতে সংযোগ কৰাত বহু চাকৰিৰ সৃষ্টি হৈছে।
আৰ্থিক উন্নতিৰ উদাহৰণ দিবলৈ গৈ প্ৰধানমন্ত্ৰীয়ে কয়, ‘মহিলাসকলৰ নামত ৩০ কোটি জনধন বেংক একাউণ্ট খোলা হৈছে। তেওঁলোকে একাউণ্টত পোনপটীয়াকৈ চৰকাৰী ৰাজসাহায্য লাভ কৰিছে।‘ প্ৰধানমন্ত্ৰীৰ মতে এই প্ৰতিটো পদক্ষেপেই কৰ্মসংস্থাপনৰ অংশ!
