অন্ধ্ৰ প্ৰদেশৰ এজন যুৱকে ট্ৰেন্সচেক্সুৱেল বন্ধুক বিয়া কৰাবলৈ লোৱা সিদ্ধান্ত মানি ল’ব নোৱাৰি যুৱকজনৰ পিতৃ-মাতৃয়ে আত্মহত্যা কৰে। অন্ধ্ৰ প্ৰদেশৰ নন্দিয়াল জিলাত সংঘটিত হৈছে এই ঘটনা। মৃত দম্পতীক চুব্বা ৰায়ুডু (৪৫) আৰু সৰস্বতী ৰায়ুডু (৩৮) বুলি চিনাক্ত কৰা হৈছে। আৰক্ষীয়ে আদবয়সীয়া দম্পতীহালৰ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে।
সঠিকভাৱে কি হৈছিল সেই বিষয়ে জানিবলৈ আৰক্ষীয়ে তদন্ত আৰম্ভ কৰিছে। নন্দিয়ালৰ মহকুমা আৰক্ষী বিষয়া পি শ্ৰীনিবাস ৰেড্ডীয়ে জনোৱা মতে, মৃত দম্পতীহালৰ পুত্ৰ বিগত তিনি বছৰ ধৰি স্থানীয় ট্ৰেন্সচেক্সুৱেল গোটৰ সৈতে জড়িত হৈ আছিল। এজন ট্ৰেন্সচেক্সুৱেলৰ সৈতেও তেওঁৰ সম্পৰ্ক আছিল। মাক-দেউতাকৰ এই কথা পছন্দ নোহোৱাৰ বাবে পুত্ৰৰ লগত কেইবামাহো ধৰি কাজিয়া হৈছিল।
যুৱকজনৰ পিতৃ-মাতৃয়েও পুত্ৰৰ বিয়াৰ বাবে কইনা চোৱাচিতা কৰিবলৈ আৰম্ভ কৰিলে। কিন্তু সেই কথাত তৰুণ মান্তি হোৱা নাছিল। শেহতীয়াকৈ তেওঁৰ পিতৃ-মাতৃয়ে এগৰাকী যুৱতীৰ সৈতে তেওঁৰ বিয়াৰ ব্যৱস্থা কৰিলে। বিবাহৰ প্ৰস্তাৱ নাকচ কৰি তেওঁ এজন যুৱক আৰু ট্ৰেন্সচেক্সুৱেল বন্ধুৰ লগত থাকিবলৈ আৰম্ভ কৰে। আৰক্ষীৰ সূত্ৰৰ পৰা জানিব পৰা মতে, এই লৈ পৰিয়ালটোত প্ৰায়ে অশান্তিৰ সৃষ্টি হৈছিল। কেতিয়াবা সেই যুৱকজনেও আত্মহত্যাৰ চেষ্টা কৰিছিল। এনে পৰিস্থিতিত বৃহস্পতিবাৰে আৰক্ষীয়ে যুৱকজনৰ পিতৃ-মাতৃৰ মৃতদেহ উদ্ধাৰ কৰে। প্ৰাথমিক তদন্তৰ অন্তত আৰক্ষীয়ে অনুমান কৰে যে পৰিয়ালটোত চলি থকা অস্থিৰতাৰ বাবেই দম্পতীহালে আত্মহত্যাৰ সিদ্ধান্ত লৈছিল।
প্ৰাথমিক তদন্তত আৰক্ষীয়ে জানিব পাৰে যে যুৱকজনে স্থানীয় ট্ৰেন্সচেক্সুৱেল গোটৰ সদস্যৰ পৰাও কিছু ধন লৈছিল। মুঠতে তেওঁ প্ৰায় ডেৰ লাখ টকা ধাৰ লৈছিল। আৰক্ষীৰ সূত্ৰৰ মতে, ঋণ পৰিশোধ কৰিবলৈ পৰিয়ালটোৰ ওপৰত হেঁচা আহিছিল। সেই ক্ষেত্ৰত আৰক্ষীয়ে আৰ্থিক চাপৰ বিষয়টোও তদন্তৰ অধীনত ৰাখিছে।
