মানালিত বৰফৰ দুৰ্যোগ! আৱদ্ধ ১০ হাজাৰ পৰ্যটকক উদ্ধাৰ, অহা ৪৮ ঘণ্টাত প্ৰচণ্ড বৰফ পৰাৰ সতৰ্কবাণী

বতৰ বিজ্ঞান বিভাগে আগন্তুক ৪৮ ঘণ্টাত হিমাচল প্ৰদেশত প্ৰচণ্ড বৰফ পৰাৰ ভৱিষ্যদ্বাণী কৰিছে। যোৱা দুদিন ধৰি কুল্লু, মানালি আৰু সোলাং উপত্যকাত আবদ্ধ হৈ আছিল হাজাৰ হাজাৰ পৰ্যটক। শনিবাৰে ৰাজ্যিক আৰক্ষীয়ে জনোৱা মতে, মানালি আৰু সোলাং উপত্যকাত আবদ্ধ হৈ থকা ১০ হাজাৰ পৰ্যটকক উদ্ধাৰ কৰা হৈছে। সেই অঞ্চলত আবদ্ধ হৈ আছিল ২০০০ গাড়ী। লগতে নিৰাপদে যান-বাহন চলাচল কৰাৰ ব্যৱস্থা কৰা হৈছে। কিন্তু চালকৰ অভাৱত আবদ্ধ হৈ আছে ১০০খন বাহন।

মানালিৰ উপ-আৰক্ষী অধীক্ষকে জনোৱা মতে, বৰফ পৰাৰ বাবে পথটো পিছল হৈ পৰিছে। ফলত বহু যান-বাহন চলাচল কৰিব পৰা নাই। বতৰ উন্নতি আৰু বৰফৰ পৰিমাণ পৰিলেই যান-বাহন স্থানান্তৰ কৰাৰ ব্যৱস্থা কৰা হ’ব। এতিয়াৰ বাবে পৰ্যটকক সোলাং উপত্যকালৈ যাবলৈ দিয়া হোৱা নাই। অৱশ্যে নেহৰু কুণ্ডলৈ যান-বাহন ওপৰলৈ যাবলৈ দিয়া হৈছে।

তুষাৰপাতৰ বাবে এসপ্তাহ ধৰি যাতায়তৰ বাবে বন্ধ হৈ আছে অটল সুৰংগ। ১৫ কিলোমিটাৰ দৈৰ্ঘ্যৰ পথটোত শ শ গাড়ীয়ে শাৰী পাতিছিল। কিন্তু এই প্ৰতিকূল বতৰৰ মাজতো মানালিত পৰ্যটকৰ যাতায়ত হ্ৰাস পোৱা নাই। বহু হোটেল মালিকে দাবী কৰে যে ই বৃদ্ধি পাইছে। পশ্চিম দিশৰ ধুমুহাৰ সৃষ্টি হৈছে বুলি বতৰ বিজ্ঞান কেন্দ্ৰই জানিবলৈ দিয়ে। যাৰ বাবে অহা ৪৮ ঘণ্টাত মানালিকে ধৰি হিমাচলৰ পাহাৰীয়া অঞ্চলত অধিক বৰফ পৰাৰ সম্ভাৱনা আছে।