এইবাৰ ইডিৰ বিষয়াৰ ঘৰত অভিযান চলালে চিবিআইয়ে। জানিব পৰা মতে, সেই ইডি বিষয়াজনৰ ঘৰৰ পৰা ১ কোটি টকাৰ নগদ ধন উদ্ধাৰ কৰা হৈছে। ইফালে ইডিৰ বিষয়াজন পলাতক অৱস্থাত আছে বুলি জানিব পৰা গৈছে।
মূল অভিযুক্তক নাপাই চিবিআইয়ে গ্ৰেপ্তাৰ কৰিছে তেওঁৰ ভাতৃক। গ্ৰেপ্তাৰ হোৱা লোকসকলক চিবিআইৰ জিম্মাত ৰখাৰ নিৰ্দেশ দিছে আদালতে। ইফালে, মূল অভিযুক্তৰ সন্ধান অব্যাহত আছে।
এই ঘটনা সংঘটিত হৈছে হিমাচল প্ৰদেশৰ ছিমলাত। অভিযুক্ত ইডি বিষয়াগৰাকী সহকাৰী সঞ্চালকৰ পদত অধিষ্ঠিত হৈ আছে। শেহতীয়াকৈ ইডিৰ চণ্ডীগড় কাৰ্যালয়ে তিনি বছৰীয়া দুৰ্নীতি প্ৰতিৰোধ আইন (পিএমএলএ)ৰ অধীনত এজাহাৰ দাখিল কৰে। তদন্তৰ অন্তত চিবিআইৰ বিষয়াসকলে অভিযুক্ত ইডিৰ বিষয়াগৰাকীৰ ঘৰত উপস্থিত হৈ অভিযান চলায়।
সংবাদ মাধ্যমৰ আগত চিবিআইৰ এগৰাকী বিষয়াই জনোৱা মতে, ইডিৰ বিষয়াগৰাকী আৰু তেওঁৰ ভাতৃ তিনি বছৰীয়া আৰ্থিক জালিয়াতিৰ গোচৰত অভিযুক্ত। দুয়োৰে বিৰুদ্ধে মুঠ ৫৪ লাখ টকাৰ উৎকোচ গ্ৰহণ কৰাৰ অভিযোগ উত্থাপন হৈছে। সেই আধাৰতে চিবিআইয়ে তেওঁলোকৰ ঘৰত অভিযান চলায়। কিন্তু সেই সময়ত বিষয়াজন ঘৰত উপস্থিত নাছিল।
চিবিআইৰ এগৰাকী জ্যেষ্ঠ বিষয়াই জনোৱা মতে, অভিযুক্ত ইডি বিষয়াজনৰ ঘৰত মুঠ ১ কোটি ১০ লাখ নগদ ধন উদ্ধাৰ কৰা হৈছে। ইয়াৰে ৫৪ লাখ টকা প্ৰথম পৰ্যায়ত উদ্ধাৰ কৰা হৈছিল, যিটো উৎকোচ হিচাপে লোৱা হৈছিল। তালাচীৰ সময়ত এখন বাহনো জব্দ কৰা হয়।
