সমগ্ৰ দেশতে আজি ৭৭তম ভাৰতীয় সেনা দিৱস উদযাপন কৰা হৈছে। ১ জানুৱাৰীত দেশৰ প্ৰতিৰক্ষা মন্ত্ৰী ৰাজনাথ সিঙে ঘোষণা কৰিছিল যে ২০২৫ চন হ’ব সংস্কাৰৰ বছৰ। সেই কথা মনত ৰাখি ভাৰতীয় সেনাই এই বছৰ শত্ৰুৰ সৈতে মুখামুখি হোৱাৰ ক্ষেত্ৰত অধিক অত্যাধুনিক, প্ৰযুক্তিগতভাৱে উন্নত, আৰু অধিক তৎপৰ তথা শক্তিশালী হোৱাৰ অংগীকাৰ কৰিছে।
৭৭ সংখ্যক সেনা দিৱসৰ থিম
২০২৩ চনটো আছিল ভাৰতীয় সেনাৰ বাবে পৰিৱৰ্তনৰ বছৰ। ২০২৪ আৰু ২০২৫ চনত সেনাৰ লক্ষ্য হৈছে প্ৰযুক্তিগত বিকাশৰ লগত খোজ মিলাই চলা। ভাৰতীয় সেনাই ইতিমধ্যে এই দশকত অৰ্থাৎ ২০২৩ চনৰ পৰা ২০৩২ চনলৈ আধুনিক যুগৰ লগত ক্ৰমান্বয়ে খাপ খুৱাই লোৱাৰ লক্ষ্য নিৰ্ধাৰণ কৰিছে। এইবাৰ ৰাজনাথ সিঙৰ দৃষ্টিভংগী অনুসৰি ২০২৫ চন সংস্কাৰ আৰু পুনৰ্গঠনৰ বছৰ হ’বলৈ গৈ আছে।
১৫ জানুৱাৰীত কিয় পালন কৰা হয় ভাৰতীয় সেনা দিৱস?
ভাৰতৰ প্ৰথমজন জেনেৰেল (পিছলৈ ফিল্ড মাৰ্শ্বাল) কে এম কেৰিয়াপ্পাই ১৯৪৯ চনত শেষৰজন ব্ৰিটিছ কমাণ্ডাৰ ইন চিফ এফ আৰ আৰ বুচাৰৰ পৰা সেনাবাহিনীৰ দায়িত্ব গ্ৰহণ কৰে। তেওঁ স্বাধীন ভাৰতৰ প্ৰথমজন মুখ্য সেনাধ্যক্ষ হিচাপে পৰিগণিত হয়। সেই দিনটোৰ স্মৃতিত প্ৰতি বছৰে ১৫ জানুৱাৰীত ভাৰতীয় সেনা দিৱস পালন কৰা হয়।
ইষ্ট ইণ্ডিয়া কোম্পানীৰ সেনাবাহিনীৰ সৃষ্টি হৈছিল পৰাধীন ভাৰতত। তাৰ পিছত ইয়াৰ নাম ব্ৰিটিছ ইণ্ডিয়ান আৰ্মী আৰু প্ৰিন্সলি ষ্টেটছ আৰ্মি ৰখা হয়। ১৯৪৭ চনত ভাৰত স্বাধীন হোৱাৰ পাছত এই দুই যৌথ বাহিনীৰ সৈতে একত্ৰিত হৈ যায় ভাৰতীয় জাতীয় সেনা (নেশ্যনেল আৰ্মি অফ ইণ্ডিয়া)।
সেনা দিৱসৰ পেৰেডত ৰবট
এইবাৰ পুনেত অনুষ্ঠিত হৈছে সেনা দিৱসৰ পেৰেড। বম্বে ইঞ্জিনিয়াৰ্ছ পেৰেড খেলপথাৰত সেনাৰ পেৰেড অনুষ্ঠিত হৈছে। এইবাৰৰ এটা বিশেষ চমক হৈছে ৰবটৰ প্ৰদৰ্শন। পেৰেডত অংশগ্ৰহণ কৰিব বিশেষ ৰবটিক মিউল (MULE) বা মাল্টি ইউটিলিটি লেগ ইকুইপমেন্ট। অত্যাধুনিক প্ৰযুক্তি আৰু অত্যাধুনিক সামৰ্থ্য থকা এই ৰবটৰ জৰিয়তে ভাৰতীয় সেনাই শত্ৰুৰ ঘাটিসমূহ সহজে চিনাক্ত কৰি ধ্বংস কৰিবলৈ সক্ষম হ’ব বুলি ধাৰণা কৰা হৈছে। একে সময়তে নিৰাপত্তাৰ ক্ষেত্ৰতো গুৰুত্বপূৰ্ণ ভূমিকা গ্ৰহণ কৰিব। এই ৰবটবোৰ বহু দূৰৰ পৰা নিয়ন্ত্ৰণ কৰিব পাৰি।
