ভূমি আৱন্টনৰ দুৰ্নীতিৰ অপৰাধত গুজৰাটৰ এজন প্ৰাক্তন আই এ এছ বিষয়াক ৫ বছৰৰ কাৰাদণ্ডৰ শাস্তি প্ৰদান কৰিছে আদালতে। অভিযোগ যে তেওঁ কচ্চৰ জিলা দণ্ডাধীশ হৈ থকাৰ সময়ত এটা ব্যক্তিগত কোম্পানীক অতি কম মূল্যত মাটি আৱন্টন দিছিল। যেতিয়া এই ঘটনা ঘটিছিল তেতিয়া বৰ্তমানৰ প্ৰধানমন্ত্ৰী নৰেন্দ্ৰ মোডী গুজৰাটৰ মুখ্যমন্ত্ৰী আছিল।
সেই দুৰ্নীতিগ্ৰস্ত আমোলাগৰাকীৰ নাম প্ৰদীপ শৰ্মা। জিলা দণ্ডাধীশ হৈ থকাৰ সময়তে ৱেলছপুন নামৰ কোম্পানী এটাক বজাৰ মূল্যতকৈ ২৫ শতাংশ কম মূল্যত মাটি আবণ্টন দিয়াৰ অভিযোগ উত্থাপন হৈছিল। যাৰ বাবে চৰকাৰৰ ১.২ কোটি টকা লোকচান হয়।
কেৱল সেয়াই নহয়, ৱেলছপুন নামৰ কোম্পানীটোত আমোলাৰ পত্নীৰ কোম্পানীটোৰ ৩০ শতাংশ অংশীদাৰিত্ব আছিল। অভিযোগ আছিল যে তেওঁ পত্নীৰ লাভৰ বাবে এই কাণ্ড সংঘটিত কৰিছিল। সোমবাৰে এই গোচৰত প্ৰদীপ শৰ্মাক ৫ বছৰৰ কাৰাদণ্ড আৰু ৭৫ হাজাৰ টকা জৰিমনা বিহা হয়।
প্ৰদীপ নামৰ এই আমোলাগৰাকীয়ে প্ৰথমবাৰৰ বাবে ২০১৪ চনত শিৰোনাম দখল কৰিছিল। সেই বছৰৰ ৩০ ছেপ্টেম্বৰত ২৯ লাখ টকাৰ উৎকোচ গ্ৰহণ কৰাৰ অভিযোগত তেওঁক দুৰ্নীতি নিবাৰক শাখাই গ্ৰেপ্তাৰ কৰে। বৰ্তমান তেওঁ সেই গোচৰত জেলত আছে।
কিন্তু এই ব্যক্তিজনে কেৱল দুৰ্নীতিৰ বাবেই নহয়, ৰাজনৈতিক কাৰণতো একাধিকবাৰ শিৰোনাম দখল কৰিছে। সূত্ৰ অনুসৰি, সেই সময়ত আমোলাগৰাকীয়ে এগৰাকী মহিলা স্থপতিবিদৰ বিৰুদ্ধে চোৰাংচোৱাগিৰিৰ অভিযোগৰ চিবিআইৰ তদন্তৰ দাবী জনাইছিল।
তদানীন্তন গুজৰাটৰ গৃহমন্ত্ৰী আৰু এজন শীৰ্ষ আৰক্ষী বিষয়াৰ মাজত হোৱা ফোন বাৰ্তালাপৰ জৰিয়তে বিষয়টো পোহৰলৈ আহে। এই অডিঅ’টো ৰাজহুৱা কৰে এটা সংবাদ মাধ্যমে। সেই কথা-বতৰাত কাৰোবাৰ নাম “চাহেব” বুলি শুনা যায়। অভিযোগ উঠিছিল যে এই ‘চাহেব’ আচলতে তেতিয়াৰ মুখ্যমন্ত্ৰী নৰেন্দ্ৰ মোডী। অৱশ্যে অমিত শ্বাহে এই অভিযোগ সম্পূৰ্ণৰূপে নাকচ কৰে।
