১৯ বছৰ অনুৰ্ধ বিশ্বকাপত হেট্ৰিক কৰা প্ৰথমগৰাকী ভাৰতীয় মহিলা হিচাপে পৰিগণিত হৈছে বৈষ্ণৱী শৰ্মা। আজি কুৱালালামপুৰত মালয়েছিয়াৰ বিৰুদ্ধে তেওঁ এই অনন্য অভিলেখ গঢ়ি তুলিছে। একপক্ষীয় যুঁজত মালয়েছিয়াক ১০ উইকেটত পৰাস্ত কৰি লীগ তালিকাৰ শীৰ্ষত উপনীত হৈছে ভাৰত।
টছত জয়ী হৈ ভাৰতে প্ৰথমে ফিল্ডিং কৰাৰ সিদ্ধান্ত লয়। বেটিং কৰিবলৈ নামি মালয়েছিয়াৰ বেটছমেনসকলে ভাৰতীয় বলাৰৰ বলিঙৰ সন্মুখত তিষ্ঠিবই নোৱাৰিলে। ৩০ ৰানৰ ভিতৰত ৬ টা উইকেট হেৰুৱায়। তাৰ ভিতৰত দুটা দখল কৰিলে বৈষ্ণৱীয়ে।
তাৰ পিছতে চতুৰ্থ অভাৰত বলিং কৰিবলৈ আহি টেইলেণ্ডাৰসকলক তচনচ কৰি পেলায়। দ্বিতীয়টো বলত নুৰ ৰাছলান এল বি ডব্লিউ আউট হয়। পৰৱৰ্তী বলটোও ভৰিত খুন্দা মাৰে। আম্পায়াৰে এল বি ডব্লিউৰ নিৰ্দেশ দিয়ে। তৃতীয় বলত চিকাৰ হয় ছিটি নাজৱা। এইবাৰ তেওঁ ক্লিন বল্ড।
এই হেট্ৰিকৰ জৰিয়তে ভাৰতে মালয়েছিয়াৰ ইনিংছ মাত্ৰ ৩১ ৰানতে সীমিত কৰে। বৈষ্ণৱীয়ে মেডেনসহ ৪ অভাৰত ৫ ৰানত ৫টা উইকেট দখল কৰি মেন অৱ দ্য মেচৰ সন্মান লাভ কৰে। প্ৰত্যুত্তৰত গংগাৰী তৃষা আৰু জি কমলিনীৰ অপেনিং যুটিয়ে ২.৫ অভাৰত কোনো উইকেট নেহেৰুৱাই দলটোক জয়ৰ সোৱাদ দিয়ে।
