ড’নাল্ড ট্ৰাম্পৰ টীমত সোমাল ভাৰতীয় ৰক্তৰ উত্তৰসূৰী। ৰাষ্ট্ৰপতি ড’নাল্ড ট্ৰাম্পে ভাৰতীয়-আমেৰিকান প্ৰাক্তন সাংবাদিক কুশ দেশাইক উপ-প্ৰেছ সচিব হিচাপে নিযুক্তি দিছে বুলি শুকুৰবাৰে হোৱাইট হাউছে ঘোষণা কৰিছে। ইয়াৰ পূৰ্বে কুশে ২০২৪ চনৰ ৰিপাব্লিকান নেচনেল কনভেনচন আৰু আইঅ’ৱাত ৰিপাব্লিকান পাৰ্টিৰ যোগাযোগ সঞ্চালক হিচাপে কাৰ্যনিৰ্বাহ কৰিছিল।
কুশে ৰিপাব্লিকান নেচনেল কমিটিৰ পেনচিলভেনিয়াৰ যোগাযোগ সঞ্চালক আৰু বেটেলগ্ৰাউণ্ড ষ্টেটসমূহত উপ-সভাপতি হিচাপেও কাৰ্যনিৰ্বাহ কৰিছিল। এই সকলোবোৰ পদত কাৰ্যনিৰ্বাহ কৰাৰ সময়ত কুশে দলৰ প্ৰচাৰত গুৰুত্বপূৰ্ণ ভূমিকা পালন কৰিছিল। তাৰ আগতে কুশৰ ৰাজনৈতিক প্ৰচাৰৰ বিস্তৃত অভিজ্ঞতা আছে। ৰিপাব্লিকান নেচনেল কমিটীত গৱেষণা বিশ্লেষক হিচাপে যোগদান কৰাৰ পূৰ্বে তেওঁ ১০ মাহ ধৰি ৱাশ্বিংটনত ডেইলী কলাৰৰ সাংবাদিক হিচাপে কাম কৰিছিল। কুশ দেশাই ডাৰ্টমাউথ কলেজৰ পৰা কলা শাখাত স্নাতক ডিগ্ৰী লাভ কৰে। কুশে ইংৰাজী আৰু গুজৰাটী ক’ব পাৰে।
কুশৰ উপৰিও ৰাষ্ট্ৰপতি হিচাপে দ্বিতীয়টো কাৰ্যকালত ড’নাল্ড ট্ৰাম্পে ৰাষ্ট্ৰীয় নিৰাপত্তা আৰু কৰ্মী বিভাগত আৰু দুজন ভাৰতীয় মূলৰ লোকক নিযুক্তি দিছে। তেওঁলোক হ’ল ক্ৰমে ৰিকি গিল আৰু সৌৰভ শৰ্মা। ৰাষ্ট্ৰীয় নিৰাপত্তা পৰিষদৰ দক্ষিণ আৰু মধ্য এছিয়ান পৰিক্ৰমা বিভাগৰ জ্যেষ্ঠ সঞ্চালক হিচাপে নিযুক্তি দিয়া হৈছে ৰিকি গিলক।
আনহাতে, সৌৰভ শৰ্মাক ট্ৰাম্পৰ কৰ্মী কাৰ্যালয়ত নিযুক্তি দিয়া হৈছে, য’ত তেওঁ কৰ্মী ব্যৱস্থাপনা আৰু চৰকাৰী নিয়োগ বিষয়ৰ দায়িত্ব ল’ব।
নিউ জাৰ্চিৰ যশবীৰ আৰু পৰম গিলৰ পুত্ৰ ৰিকি গিল। প্ৰিন্সটন বিশ্ববিদ্যালয়ৰ পৰা স্নাতক ডিগ্ৰী লাভ কৰি কেলিফৰ্ণিয়া বিশ্ববিদ্যালয়ৰ পৰা আইনৰ ডিগ্ৰী লাভ কৰে। সৌৰভ শৰ্মাৰ জন্ম হৈছিল বাংগালুৰুত। টেক্সাছ বিশ্ববিদ্যালয়ৰ পৰা জৈৱ ৰসায়ন বিজ্ঞানত স্নাতক ডিগ্ৰী লাভ কৰে।
