মুম্বাইত এগৰাকী চফটৱেৰ ইঞ্জিনিয়াৰক ধৰ্ষণ আৰু হত্যাৰ অপৰাধত মৃত্যুদণ্ডৰ শাস্তি পোৱা এজন ব্যক্তিক উচ্চতম ন্যায়ালয়ে দোষমুক্ত ঘোষণা কৰে। আৰজি কৰত এগৰাকী চিকিৎসক-ছাত্ৰক ধৰ্ষণ আৰু হত্যাৰ গোচৰত দোষী সাব্যস্ত হোৱা সঞ্জয় ৰয়ৰ মৃত্যুদণ্ডৰ দাবী ক্ৰমান্বয়ে তীব্ৰতৰ হৈ পৰাৰ মাজতে অন্য এটা গোচৰত আজি মঙলবাৰে দেশৰ শীৰ্ষ আদালতে মৃত্যুদণ্ড লাভ দোষীক দোষমুক্ত কৰাৰ ৰায় দিয়ে।
উল্লেখ্য যে, ২০১৪ চনৰ ৫ জানুৱাৰীত মুম্বাইৰ ২৩ বছৰীয়া আই টি কৰ্মী এষ্টাৰ অনুহিয়াক ধৰ্ষণ আৰু হত্যাৰ গোচৰত ২০১৫ চনত বিশেষ মহিলা আদালতে মৃত্যুদণ্ডৰ শাস্তি প্ৰদান কৰিছিল চন্দ্ৰবন সনাপক। এষ্টাৰৰ ঘৰ আছিল বিশাখাপট্টনমত।তেঁও কামৰ বাবে মুম্বাইলৈ আহিছিল। চন্দ্ৰভানে এষ্টাৰক লোকমান্য তিলক টাৰ্মিনাছলৈ লিফ্ট দিব বিচাৰে। পাছত কুঞ্জাৰমাৰ্গ নামৰ ঠাইত মহিলাক গাড়ীত উঠাই ধৰ্ষণ কৰি হত্যা কৰাৰ অভিযোগ উত্থাপন হৈছিল।
চন্দ্ৰভানে যুৱতীগৰাকীৰ লেপটপকে ধৰি সকলো বস্তু চুৰি কৰি লৈ যায়। আৰু তেওঁৰ মৃতদেহ যাতে চিনাক্ত নহয় তাৰ বাবে জ্বলাই দিলে। ১৭ জানুৱাৰীত ভাণ্ডুপ নামৰ ঠাইৰ পৰা যুৱতীগৰাকীৰ অৰ্ধগলিত মৃতদেহ উদ্ধাৰ কৰা হয়। ৰে’ল আৰক্ষীয়ে চিচিটিভি চাই অপৰাধীজনক চিনাক্ত কৰে। ২০১৪ চনৰ ৩ মাৰ্চত আৰক্ষীয়ে সনাপক গ্ৰেপ্তাৰ কৰি ধৰ্ষণ-হত্যাৰ গোচৰ ৰুজু কৰে।
চন্দ্ৰভানে নিম্ন আদালতত মৃত্যুদণ্ডক প্ৰত্যাহ্বান জনাই বোম্বাই উচ্চ ন্যায়ালয়ত আবেদন দাখিল কৰে। কিন্তু বম্বে উচ্চ ন্যায়ালয়েও এই আবেদন নাকচ কৰি মৃত্যুদণ্ডৰ শাস্তিও দাখিল কৰে। উচ্চ ন্যায়ালয়ৰ ৰায়দানত কোৱা হৈছে যে তেওঁ সমাজৰ বাবে অত্যন্ত ক্ষতিকাৰক আৰু তেওঁৰ সংস্কাৰৰ কোনো সম্ভাৱনা নাই। এই সকলোবোৰ গুৰুতৰ অপৰাধ উচ্চ ন্যায়ালয়তো প্ৰমাণিত হোৱাৰ পাছতো আজি উচ্চতম ন্যায়ালয়ে সনাপৰ সপক্ষে ৰায় দিয়ে। উচচতম ন্যায়ালয়ে ধৰ্ষণ-হত্যাৰ গোচৰৰ সমৰ্থনত অসামঞ্জস্য আৰু প্ৰমাণ আৰু শক্তিশালী যুক্তিৰ অভাৱৰ ভিত্তিত অভিযুক্তক দোষমুক্ত কৰে।
