দিনটো সজীৱ আৰু কৰ্মঠ হৈ থাকিবলৈ আমাৰ শৰীৰৰ আভ্যন্তৰীণ শক্তি বা ষ্টেমিনাৰ প্ৰয়োজন। ষ্টেমিনাৰ অভাৱ হ’লে আমি কোনো শাৰীৰিক বা মানসিক কাৰ্যকলাপ ভালকৈ কৰিব নোৱাৰোঁ। ষ্টেমিনাৰ অভাৱত মানুহ অতি সোনকালেই ভাগৰি পৰে। ষ্টেমিনাই মানুহক বলবান আৰু বেগী কৰি তোলাৰ লগতে বিভিন্ন ৰোগ ব্যাধিৰ পৰাও ৰক্ষা কৰে। সেয়ে আমি আমাৰ শৰীৰৰ ষ্টেমিনা বৃদ্ধি কৰাতো অতিকে প্ৰয়োজন।
সেয়ে আজি আপোনালোকৈ লৈ আহিছোঁ প্ৰাকৃতিকভাবে ষ্টেমিনা বৃদ্ধি কৰাৰ কিছু উপায় —
১. নিয়মীয়া ব্যায়াম কৰক: দৌৰা, জপিওৱা, চাইকেল চলোৱা, খেলা ধূলা আদি নিয়মীয়াকৈ কৰিলে হৃদযন্ত্ৰ আৰু হাওফাওৰ কাৰ্যক্ষমতা বাঢ়ে। ইয়াৰ লগতে মাংস পেশীও শক্তিশালী হয়। গতিকে প্ৰতিদিনে ৩০ মিনিট ব্যায়াম কৰক।
২. সুস্থ খাদ্যাভ্যাস : আমি আামাৰ শৰীৰৰ মাংস পেশী বৃদ্ধি আৰু শক্তিশালী কৰাৰ বাবে প্ৰ’টিনযুক্ত খাদ্য যেনে কণী, মাছ, দাইল, চয়াবিন আদি খাব লাগে। লগতে শক্তি বৃদ্ধিৰ বাবে কাৰ্বহাইড্ৰেটযুক্ত খাদ্য যেনে ভাত, ৰুটি, অটছ আদি খাব লাগে। লগতে ভিটামিন আৰু খনিজ পদাৰ্থৰ বাবে সেউজীয়া শাকপাচলি আৰু ফলমূল প্ৰচুৰ পৰিমাণে খাব লাগে। লগতে জাংক ফুড একেবাৰে ত্যাগ কৰক। খাদ্য সময় মতে গ্ৰহণ কৰক।
৩. পানী : শৰীৰটো কৰ্মঠ হৈ থাকিবলৈ হ’লে আমাক পানীৰ প্ৰয়োজন। সেয়ে দৈনিক ৮ৰ পৰা ১০ গিলাচ পানী খোৱাৰ চেষ্টা কৰক।
৪. পর্যাপ্ত বিশ্ৰাম লওক : নিতৌ নিশা ৭ৰ পৰা ৮ ঘণ্টা টোপনি যাব লাগে। বিশ্ৰাম নল’লে শৰীৰে কাম কৰাৰ ক্ষমতা হেৰুৱায়।
৫. যোগ আৰু প্ৰাণায়াম : সূৰ্য নমস্কাৰ, কপালভাতি আদি যোগাসনৰ দ্বাৰা শৰীৰৰ সহনশীলতা আৰু শ্বাসপ্ৰশ্বাস নিয়ন্ত্ৰণ কৰিব পাৰি।
৬. বেয়া অভ্যাস এৰক: ধূমপান, মদ্যপান আদিয়ে শৰীৰৰ অক্সিজেন চলাচল কমায়। গতিকে এইবোৰ অখাদ্য ভক্ষণ কৰিলে শৰীৰত জোৰ বল কমি যায়।
৭. মানসিক চাপ কমাওক: মানসিক চাপে আমাৰ মনৰ লগতে শৰীৰৰো বল হ্ৰাস কৰে। গতিকে ৰং মনেৰে থাকক।
