পৃথিৱীত প্ৰেমৰ জাল অনৱগুণ্ঠিত নহয়, একেবাৰে মোহজাল-মায়াজালেৰে পৰিপূৰ্ণ। ইয়াৰ পিছতো বহু লোকে সংগী বিচাৰি হাবাথুৰি খাইছে। আজিকালি সংগী বিচাৰি পোৱাৰ একমাত্ৰ ভৰসা হ’ল ডেটিং এপ বা ছ’চিয়েল মিডিয়া। অৱশ্যে ডেটিং এপৰ প্ৰতিও বহুতে পিঠি দিছে। কিছুমানে সম্পৰ্ক-বন্ধুত্বৰ পৰা বাহিৰলৈ ওলাই গৈ নতুন পন্থাৰ ফালে মুখ কৰিছে। জীৱন সংগী বিচাৰি উলিওৱাৰ এনে এটা কৌশল হ’ল ‘আনাৰস ডেটিং’। জীৱন সংগী বিচাৰিবলৈ স্পেইনৰ নাগৰিকৰ মাজত ‘আনাৰস ডেটিং’ অতি জনপ্ৰিয়। অনলাইনৰ বাহিৰত এইটো এটা অভিনৱ পদ্ধতি।
জীৱন সংগীৰ সন্ধান
স্পেইনৰ জনপ্ৰিয় চুপাৰ মাৰ্কেট মাৰ্কাডোনাত মুকলি কৰা হৈছে এই ‘পাইনেপুল ডেটিং’। নিসংগতাৰ সংকেত দিবলৈ আনাৰস ব্যৱহাৰ কৰা হৈছে। শ্বপিং কাৰ্টত আনাৰস এটা ওলোটাকৈ ৰাখিলে বুজোৱা হৈছে, “মই অকলশৰীয়া, জীৱন সংগী বিচাৰিছো।” সেই ওলোটা আনাৰস দেখি কোনো ব্যক্তি আগ্ৰহী হৈ আগুৱাই আহি সেই অকলশৰীয়া মানুহৰ সৈতে কথা পাতিছে। দুয়োৰে পছন্দ-অপছন্দ একে হ’লেই সম্পৰ্ক আগবাঢ়িছে।
জেন জেড–ৰ পছন্দ
ৰিল আৰু টিকটকৰ জৰিয়তে আনাৰস ডেটিংৰ জনপ্ৰিয়তা বাঢ়িছে। Gen Z সকল ডেটিংৰ প্ৰতি অতি আগ্ৰহী। জেন জেড হৈছে ১৯৯০ চনৰ পৰা ২০১০ৰ ভিতৰত জন্মগ্ৰহণ কৰা প্ৰজন্ম যিসকল ইন্টাৰনেটৰ প্ৰতি অতি আগ্ৰহী। আমোদজনকভাৱে এই উদ্ভাৱনীমূলক ডেটিংৰ বাবে আনাৰসৰ বিক্ৰীও যথেষ্ট বৃদ্ধি পাইছে। অৱশ্যে যিকোনো সময়তে কেৱল আনাৰস কিনিব নোৱাৰি। সংগী বিচৰাৰ সময় হৈছে সন্ধিয়া ৭ বজাৰ পৰা নিশা ৮ বজালৈ।
আনাৰসতকৈও আৰু বেছি কিবা এটা
ইয়াতেই ক্ষান্ত নহয়। স্পেইনৰ এটা সংবাদ মাধ্যমত প্ৰকাশিত বাতৰি অনুসৰি আনাৰসৰ উপৰিও বহুতে শ্বপিং কাৰ্টত চকলেট বা মিঠাই ৰাখিছে। অৰ্থাৎ তেওঁলোকে দীৰ্ঘম্যাদী সম্পৰ্কৰ প্ৰতি আগ্ৰহী। ক্ষন্তেকীয়া সম্পৰ্ক বিচৰাসকলে ট্ৰলীত দাইল বা চীনালাই ৰাখিছে। বিবিচিৰ এক প্ৰতিবেদনত কোৱা হৈছে যে টেলিভিছনৰ তাৰকা অভিনেতা ভিভিয়ান লিনে আনাৰস ডেটিং ট্ৰেণ্ডক জনপ্ৰিয় কৰাত গুৰুত্বপূৰ্ণ ভূমিকা পালন কৰিছিল। তেওঁ পোষ্ট কৰা এটা ভিডিঅ’ত দেখা গৈছে যে মাৰ্কাডোনা চুপাৰ মাৰ্কেটত গৈ তেওঁ শ্বপিং কাৰ্টত আনাৰস ৰাখিছে।
আনাৰস ডেটিঙৰ নতুন ধাৰাটোক লৈ বহুতে অত্যন্ত সুখী। তেওঁলোকৰ যুক্তি হ’ল, সংগী বিচাৰি পাও বা নাপাও, এটা গোটা আনাৰস ঘৰলৈতো আহিছে। সেইটোৱে কম নে?
