ৰাষ্ট্ৰীয় স্বয়ং সেৱক সংঘ চমুকৈ আৰএছএছৰ অসম শাখাত ব্যাপক সাংগঠনিক সালসলনি ঘটাইছে সংগঠনটোৰ শীৰ্ষ নেতৃত্বই।সেই অনুসৰি ৰাষ্ট্ৰীয় স্বয়ং সেৱক সংঘৰ উত্তৰ অসমৰ প্ৰান্ত প্ৰচাৰ প্ৰমুখৰ দায়িত্ব যোৰহাটৰ নিৰুপম বৰুৱাক অৰ্পণ কৰা হৈছে। দেওবাৰে এই সালসলনি কৰে সংগঠনটোৱে।
উল্লেখযোগ্য যে পূৰ্বতে এই পদত আছিল শংকৰ দাস। সম্প্ৰতি আৰ এছ এছ নেতা শংকৰ দাসক অসম ক্ষেত্ৰৰ বৌদ্ধিক প্ৰমুখৰ দায়িত্ব দিয়া হৈছে বুলি জানিব পৰা গৈছে।
আনহাতে বাবলু বৰাক বিশ্ব হিন্দু পৰিষদৰ সাংগঠনিক সম্পাদক আৰু হেমন্ত ধিং মজুমদাৰক বিদ্যা ভাৰতীৰ সাংগঠনিক সম্পাদকৰ দায়িত্ব অৰ্পণ কৰা হৈছে।
শেহতীয়াভাৱে বিশ্বনাথ চাৰিআলিত তিনিদিনীয়াকৈ অনুষ্ঠিত আৰ এছ এছৰ উত্তৰ অসম প্ৰান্তৰ বাৰ্ষিক বৈঠকে এই সাংগঠনিক সালসলনি কৰিছে বুলি জানিব পৰা গৈছে।
প্ৰসংগক্ৰমে উল্লেখযোগ্য যে ২০১৯ চনৰ লোকসভা নিৰ্বাচনলৈ মাজত মাথোঁ কেইটিমান মাহ বাকী আছে। এনে অৱস্থাত এনেদৰে ব্যাপক সাংগঠনিক সালসলনি কৰি আৰ এছ এছে তেওঁলোকৰ ভেটি মজবুত কৰাৰ উপৰি এক নতুন ৰণকৌশল ৰচনা কৰাৰ প্ৰস্তুতি আৰম্ভ কৰিছে। স্মৰ্তব্য যে কেইমাহমান পূৰ্বে নাগপুৰত অনুষ্ঠিত আৰ এছ এছৰ বৈছকত বশিষ্ঠ বুজৰবৰুৱাক উত্তৰ পূবৰ সহ কাৰ্যবাহৰ দায়িত্ব অৰ্পণ কৰা হৈছিল।
