মধ্য আমেৰিকাৰ সৰু দেশ গুৱেটামালাত সংঘটিত হৈছে এক ভয়ংকৰ দুৰ্ঘটনা। এখন যাত্ৰীবাহী বাছ দলঙৰ ১১৫ ফুট তলৰ খাৱৈত বাগৰি পৰে। এই মৰ্মান্তিক ঘটনাত ৫৫ জন লোকৰ মৃত্যু হয়।
সোমবাৰে সংঘটিত হোৱা এই দুৰ্ঘটনাটোৱে সমগ্ৰ দেশতে শোকৰ ছাঁ পেলাইছে। দেশৰ ৰাষ্ট্ৰপতি বাৰ্নাৰ্ডো আৰেভায়োৱে এই দুৰ্ঘটনাক লৈ শোক প্ৰকাশ কৰে।
গুৱেটামালাৰ অগ্নিনিৰ্বাপক বাহিনীৰ বিষয়া এডউইন ভিলাগ্ৰানে জনায় যে ৰাজধানীৰ উত্তৰ-পূবৰ প্ৰগ্ৰেছোৰ পৰা বাছখন আহিছিল। গন্তব্যস্থান আছিল গুৱেটামালা চহৰ। বাটতে দলঙত দুৰ্ঘটনাত পতিত হয় বাছখন।
কোনো কাৰণত পথতে উপৰ্যুপৰি গাড়ীত খুন্দা মৰাৰ ঘটনা ঘটে যাৰ ফলত যাত্ৰীৰে ভৰ্তি বাছখন দলঙৰ পৰা ১১৫ ফুট তলৰ এটা খাৱৈত পৰি যায়। থিতাতে মৃত্যু হয় ৫৩ জন যাত্ৰীৰ। গুৰুতৰভাৱে আহত কেইবাজনো লোকক ছান জুয়ান ডি ডিয়ছ হাস্পতাললৈ লৈ যোৱা হয়, য’ত চিকিৎসাৰ সময়ত দুজনৰ মৃত্যু হয়। অগ্নিনিৰ্বাপক বাহিনীৰ বিষয়া অস্কাৰ ছানচেজে কয় যে মৃত্যু হোৱা লোকসকলৰ ভিতৰত শিশুও আছে।
প্ৰাৰম্ভিক তদন্তৰ পৰা জানিব পৰা গৈছে যে বাছখনে কেনেবাকৈ নিয়ন্ত্ৰণ হেৰুৱাই পেলাইছিল। সেই পৰিস্থিতিত ই কেইবাখনো গাড়ীত খুন্দা মাৰে। ইয়াৰ পিছতে লোহাৰ ৰেলিং ভাঙি তলৰ খাৱৈত এটাত পৰিল। লেতেৰা পানীৰ খাৱৈত বাছখনৰ সন্মুখৰ অংশটো ডুব যায়।
এই দুৰ্ঘটনাৰ খবৰ শুনি দেশখনৰ ৰাষ্ট্ৰপতি বাৰ্নাৰ্ডো আৰেভায়োৱে ছ’চিয়েল মিডিয়াত শোক প্ৰকাশ কৰে। তেওঁ দেশত ৰাষ্ট্ৰীয় শোক দিৱস ঘোষণা কৰিছে। তেওঁ লগতে লিখিছে, “যিটো হ’ল সেয়া অতি দুৰ্ভাগ্যজনক। আহতসকলে যাতে ভাল চিকিৎসা লাভ কৰে তাৰ বাবে চৰকাৰে যৎপৰোনাস্তি চেষ্টা কৰিব।”
