দেওবাৰে অনুষ্ঠিত হৈ যায় প্ৰয়াত গণশিল্পী ৰাজীৱ শদিয়াৰ ৰাজহুৱা আদ্যশ্ৰাদ্ধ। ৰাজীৱ শদিয়াৰ মৃত্যুৱে যেন অধিক উজ্জ্বলাই তুলিলে তেখেতৰ প্ৰতিভাক। জীৱন কালত বঁটা-বাহন, সা-সন্মান বৰ বিশেষ এক নাপালেও মৃত্যুৰ পিছত এগৰাকী শিল্পীৰ প্ৰাপ্য মৰ্যাদা লাভ কৰিলে ৰাজীৱ শদিয়াই। মৃত্যুৰ পিছত অজস্ৰ গুণমুগ্ধই ভিৰ কৰিলে ৰাজীৱ শদিয়াৰ বাসগৃহত। হাজাৰ হাজাৰ গুণমুগ্ধৰ উপস্থিতিত পালন কৰা হ’ল ৰাজীৱ শদিয়াৰ আদ্যশ্ৰাদ্ধ।
কিন্তু ইয়াৰ মাজতে ‘নৰ্থ ইষ্ট নাও’ৰ দৃষ্টিগোচৰ হৈছে আন এক বিষয়। ২০২৪ চনৰ ১ আগষ্ট তাৰিখে ৫৩ সংখ্যক গোৱা আন্তঃৰাষ্ট্ৰীয় চলচ্চিত্ৰ মহোৎসৱৰ এটা ভিডিঅ’ ফেচবুকত শ্বেয়াৰ কৰিছিল জনপ্ৰিয় গায়ক তথা বিজেপি নেতা সীমান্ত শেখৰে। গোৱা আন্তঃৰাষ্ট্ৰীয় মহৎসৱত সীমান্ত শেখৰে কন্ঠদান কৰা ‘জিলেলে জিলেলে অ’ জিলেলে জিলেলে’ শীৰ্ষক গীতটোত নৃত্য কৰিছিল এচাম নৃত্য শিল্পীয়ে। সেই ভিডিঅ’টো শ্বেয়াৰ কৰি সীমান্ত শেখৰে ফেচবুকত লিখিছিল এইদৰে – “আগন্তুক ৫৩ সংখ্যক গোৱা আন্তঃৰাষ্ট্ৰীয় চলচ্চিত্ৰ মহোৎসৱ (IFFI Goa) ত ফিউজন নৃত্য প্ৰদৰ্শন কৰিব বহু কেইগৰাকী জনপ্ৰিয় চলচ্চিত্ৰ অভিনেতা-অভিনেত্ৰীয়ে। তাৰে প্ৰস্তুতিত আমাৰ গান “জিলেলে জিলেলে”ত এক নৃত্য দেখি খুবেই আপ্লুত হৈছোঁ।”
সীমান্ত শ্বেখৰৰ উক্ত পোষ্টটো কমেন্ট কৰিছিল ৰাজীৱ শদিয়াই। ‘ৰাজীৱ শদিয়া নতুন’ নামৰ একাউণ্টটোৰ পৰা তাত এটা কমেন্ট কৰা হৈছিল। কমেন্টত শদিয়াই লিখিছিল – “এইটো মোৰহে গান আছিলে । পাছলৈ বেলেগৰ পৰা গান লৈ কৰিলে সম্পূৰ্ণ তথ্য লৈ কৰিব । আপুনি জনা বুজা মানুহ বিশেষ নকওঁ ।”
সেই সময়ত ৰাজীৱ শদিয়াই দিয়া এই কমেন্টটোৱে চৰ্চা লাভ কৰা নাছিল যদিও এই কমেন্টটো এতিয়া নৰ্থ-ইষ্ট নাওৰ দৃষ্টি গোচৰ হৈছে।
সীমান্ত শেখৰৰ পোষ্টটোৰ লিংক : https://www.facebook.com/simantashekharmusic/videos/505698382016621
উল্লেখ্য যে পূৰ্বে এই গীতটো দেৱজিৎ বৰাই ৰচনা কৰা বুলি দাবী উত্থাপন হৈছিল। কিন্তু ৰাজীৱ শদিয়ায়ো এই গীতটো নিজৰ বুলি দাবী কৰাত এতিয়া এক ৰহস্যৰ সৃষ্টি হৈছে।
উল্লেখ্য যে সীমান্ত শেখৰৰ উক্ত পোষ্টটো Xuman Dutta Raz নামৰ একাউণ্টোৰ পৰা কমেন্ট কৰিছিল – “এইটো দেৱজিৎ ৰ পৰা চুৰ কৰা নহৈ জানো।।” Xuman Dutta Raz ৰ কমেন্টটোৰো উত্তৰ দিছিল ৰাজীৱ শদিয়াই। শদিয়া উত্তৰ দিছিল – “নহয় । মোৰ পৰা।”
এতিয়া প্ৰশ্ন হয়- গীতটো আচলতে কাৰ? গীতটো কোনে ৰচনা কৰিছিল বা কোনে সুৰ কৰিছিল? সঁচাকৈয়ে গীতটো ৰাজীৱ শদিয়াৰ আছিল নেকি? অৱশ্যে এই কথাৰ উত্তৰ এতিয়া ৰাজীৱ শদিয়াৰ পৰিয়ালৰ লোক বা তেওঁৰ ঘনিষ্ঠলোকে হে দিব পাৰিব।
