কোকৰাঝাৰ আৰু চিৰাং জিলাৰ ৰাইমনা আৰু মানস ৰাষ্ট্ৰীয় উদ্যানৰ মাজত অৱস্থিত চিকনা জৌহৌলাও সংৰক্ষিত বনাঞ্চলখন অসমৰ অষ্টম ৰাষ্ট্ৰীয় উদ্যান হ’ব বুলি দেওবাৰে ৰাজ্যিক কেবিনেটে সিদ্ধান্ত লয়।
পৰিৱেশ সংৰক্ষণৰ দিশত এক বৃহৎ পদক্ষেপ হিচাপে কেবিনেটে আনুষ্ঠানিকভাৱে চিকনা জৌহৌলাওক অসমৰ অষ্টম ৰাষ্ট্ৰীয় উদ্যান হিচাপে ঘোষণা কৰে।
ৰাইমনা আৰু মানস ৰাষ্ট্ৰীয় উদ্যানৰ মাজত কৌশলগতভাৱে অৱস্থিত বনাঞ্চলখনৰ সন্দৰ্ভত লোৱা এই পদক্ষেপে জৈৱ বৈচিত্ৰ্য সুৰক্ষা বৃদ্ধি কৰাৰ লগতে ৰাজ্যখনৰ পৰিৱেশ পৰ্যটনক উন্নীত কৰিব বুলি আশা কৰা হৈছে।
সংবাদ মাধ্যমৰ আগত কেবিনেট বৈঠকৰ পিছত মুখ্যমন্ত্ৰী হিমন্ত বিশ্ব শৰ্মাই কয় যে, “দহখন ৰাষ্ট্ৰীয় উদ্যান থকা মধ্যপ্ৰদেশৰ পিছতে এতিয়া অসমত দ্বিতীয় সৰ্বাধিক ৰাষ্ট্ৰীয় উদ্যান থাকিব।”
ইপিনে, অসম সংহত স্বচ্ছ শক্তি নীতি, কাৰ্বি আংলঙৰ সৌৰ উদ্যান, সোণাপুৰ আৰু ডিমৰিয়াৰ দুখন ঔদ্যোগিক উদ্যান, জাগীৰোড আৰু ৰহাৰ মাজৰ ৫৭০ বিঘা ভূমিত এখন বিশাল ঔদ্যোগিক পামত ৰাজ্যিক কেবিনেটে অনুমোদন দিয়ে।
আনহাতে, তিৱা স্বায়ত্ত শাসিত পৰিষদৰ আসনৰ সংখ্যা ৩৬ৰ পৰা ৪২লৈ বৃদ্ধি কৰাৰ লগতে আয়ুৰ্বেদিক স্নাতকোত্তৰ চৰকাৰী চিকিৎসকক তিনিটাকৈ এডভাঞ্চ ইনক্ৰিমেন্টৰ সিদ্ধান্ততো মন্ত্ৰীসভাই সিদ্ধান্ত গ্ৰহণ কৰে।
ইয়াৰ উপৰিও বড়োলেণ্ড টেৰিটৰিয়েল ৰিজিঅ’নত ব্যক্তিগত স্বামী বিবেকানন্দ বিশ্ববিদ্যালয় স্থাপনতো কেবিনেটে অনুমোদন প্ৰদান কৰে।
