টাই আহোম যুৱ পৰিষদ, চমুকৈ টাইপা আৰু শ্ৰীমন্ত শঙ্কৰদেৱ সঙ্ঘৰ মাজত চলি থকা বাক-বিতণ্ডাৰ মাজতে একেলগে বহু আহোম পৰিয়ালে ত্যাগ কৰিছে সঙ্ঘৰ সংগী পদ।
গহপুৰৰ ককিলাগুৰিৰ ১৭ টাকৈ আহোম পৰিয়ালে সঙ্ঘৰ সংগী পদ ত্যাগ কৰাৰ লগতে সঙ্ঘৰ নীতি-আদৰ্শ ত্যাগ কৰিছে।
শ্ৰীমন্ত শঙ্কৰদেৱ সঙ্ঘ ত্যাগ কৰি পৰিয়াল কেইটাই আহোমৰ পৰম্পৰাগত ফুৰালুং ধৰ্ম গ্ৰহণ কৰিছে। সঙ্ঘ ত্যাগ কৰি আহোমৰ পৰম্পৰাগত সাজপাৰ পৰিধান কৰি টাই সকলৰ উপাসনাস্থলীত উপস্থিত হৈ ফুৰালুং ধৰ্ম গ্ৰহণ কৰিছে পৰিয়ালকেইটাই।
উল্লেখ্য যে ইয়াৰ পূৰ্বে কেইবাটাও আহোম সংগঠনে আহোমসকলক শঙ্কৰ সঙ্ঘ ত্যাগ কৰিবলৈ আহ্বান জনাইছিল।
উল্লেখ্য কৰাৰ প্ৰয়োজন নাই যে গহপুৰৰ নিবাসী তথা শ্ৰীমন্ত শঙ্কৰদেৱ সঙ্ঘৰ সদস্য চন্দ্ৰ বৰুৱাই মে-ডাম-মে-ফি উৎসৱত অংশগ্ৰহণ কৰাৰ পিছতে সংঘই বৰুৱাৰ বিৰুদ্ধে অনুশাসনমূলক ব্যৱস্থা গ্ৰহণ কৰি ৫০০ টকা জৰিমনা বিহিছিল। ইয়াৰ পিছতে টাইপাই সঙ্ঘৰ সংবিধান দাহ কাৰ্যসূচী গ্ৰহণ কৰে। লগে লগে বিতৰ্কই তুংগত উঠে। টাইপা আৰু সঙ্ঘৰ মাজত সৃষ্টি হয় বাক বিতণ্ডা।
আহোম জনগোষ্ঠীক সঙ্ঘই কৰা এই অপমানৰ বাবে ক্ষমা খোজাৰ দাবী জনাইছিল যদিও সঙ্ঘই ক্ষমা খোজা নাছিল।
ইয়াৰ পৰিৱৰ্তে সংবিধান দহনৰ বাবে সঙ্ঘই টাইপাৰ নেতাসকলৰ বিৰুদ্ধে বিভিন্ন থানাত গোচৰ ৰুজু কৰে। ইয়াৰ পিছত টাইপায়ো সংঘৰ বিৰুদ্ধে এজাহাৰ দাখিল কৰে।
