২২ জুনৰ পৰা শক্তিপীঠ কামাখ্যাত আৰম্ভ হ’ব ঐতিহাসিক অম্বুবাচী মেলা। অম্বুবাচীৰ প্ৰাকমুহূৰ্তত মেলা আয়োজনক লৈ তৎপৰ হৈ পৰা পৰিলক্ষিত হৈছে পৰ্যটন মন্ত্ৰী চন্দন ব্ৰহ্ম। এই উদ্দেশ্যে সোমবাৰে পৰ্যটন বিভাগৰ প্ৰশান্তি ল’জত পৰ্যটন নিগমৰ অধ্যক্ষ জয়ন্তমল্ল বৰুৱাৰ উপস্থিতিত দলৈ সমাজৰ সৈতে মন্ত্ৰী চন্দন ব্ৰহ্মৰ এখন গুৰুত্বপূৰ্ণ বৈঠক অনুষ্ঠিত হয়।
অম্বুবাচী মেলাৰ প্ৰস্তুতি সন্দৰ্ভত দলৈ সমাজৰ লগত আলোচনা কৰি ভক্তৰ সমাগমৰ প্ৰতি লক্ষ্য ৰাখি এইবাৰ ফাঁচিবজাৰৰ পুৰণি জে’ল চৌহদতো ভক্ত ৰখাৰ বাবে শিবিৰৰ ব্যৱস্থা কৰা হ’ব বুলি জানিবলৈ দিয়ে।
উল্লেখযোগ্য যে বিগত বৰ্ষতেই অম্বুবাচী মেলাখন আন্তৰ্জাতিক পৰ্যায়ৰ মেলা হিচাপে অনুষ্ঠিত কৰাৰ পাছত প্ৰায় ১৫-২০ লাখৰো অধিক দেশী-বিদেশী ভক্তৰ সমাগম হয়। আনহাতে, সোণাৰাম হাইস্কুলৰ খেলপথাৰৰ পৰা কামাখ্যালৈকে শীঘ্ৰে ৰ’পৱে’ৰ কাম আৰম্ভ কৰিব বুলি পৰ্যটন নিগমৰ অধ্যক্ষ জয়ন্তমল্ল বৰুৱাই সদৰী কৰে।
ভক্তসকলৰ থকা-খোৱাৰ বাবে নতুনকৈ সংযোজিত ফাঁচিবজাৰৰ পুৰণি জে’ল চৌহদৰ উপৰি সোণাৰাম হাইস্কুলৰ খেলপথাৰ, কামাখ্যা ৰে’লৱে ষ্টেশ্যন, পাণ্ডুনাথ দেৱালয় আৰু কামাখ্যা মন্দিৰৰ কাষৰ নাহৰবাৰী আৰু বংশীবাগানত শিবিৰ স্থাপন কৰিব।
উল্লেখযোগ্য যে মেলাৰ প্ৰাকমুহূৰ্তত নীলাচল পাহাৰত থকা শক্তিপীঠ কামাখ্যালৈ বাবা আৰু সাধুসকলৰ আগমন ঘটে। উক্ত সময়ছোৱাত একপ্ৰকাৰ অলৌকিক পৰিৱেশৰ সৃষ্টি হয় নীলাচলৰ বুকুত।
ইফালে, অহা ৩১ মে’ত অম্বুবাচী মেলাৰ প্ৰস্তুতি সন্দৰ্ভত মুখ্য মন্ত্ৰী সৰ্বানন্দ সোণোৱালৰ লগত আন এখন বৈঠক অনুষ্ঠিত হ’ব বুলিও জানিবলৈ দিয়ে।
