নতুন শিক্ষাবৰ্ষত ডিব্ৰুগড় বিশ্ববিদ্যালয়ে আৰম্ভ কৰিব জাপানী ভাষাৰ পাঠ্যক্ৰম। মুখ্যমন্ত্ৰী হিমন্ত বিশ্ব শৰ্মাই সামাজিক মাধ্যমৰ জৰিয়্তে এই কথা সদৰী কৰিছে। অসমৰ যুৱক-যুৱতীসকলক জাপানী ভাষাৰ দক্ষতাৰে সজ্জিত কৰাৰ বহল প্ৰচেষ্টাৰ অংশ হিচাপে এই পদক্ষেপ গ্ৰহণ কৰা হৈছে বুলি মুখ্যমন্ত্ৰীগৰাকীয়ে উল্লেখ কৰে।
শেহতীয়াকৈ বিশ্ববিদ্যালয় চৌহদত জাপান ফাউণ্ডেচনৰ উদ্যোগত অনুষ্ঠিত হোৱা “জাপান কাৰাভান” অনুষ্ঠানটো অনুষ্ঠিত হয়। এই কাৰ্যসূচীয়ে শৈক্ষিক প্ৰতিষ্ঠান আৰু জাপানী সংস্থাসমূহৰ মাজত ভৱিষ্যতৰ সহযোগিতাৰ বাবে এক মূল শিলাস্তম্ভ হিচাপে কাম কৰিব বুলি আশা প্ৰকাশ কৰিছে।
এই কাৰ্যসূচীয়ে অসম আৰু জাপানৰ মাজত শৈক্ষিক আৰু সম্ভাৱ্য অৰ্থনৈতিক সম্পৰ্ক শক্তিশালী কৰাৰ ক্ষেত্ৰত এক গুৰুত্বপূৰ্ণ পদক্ষেপ যি ছাত্ৰ-ছাত্ৰীসকলক আন্তঃৰাষ্ট্ৰীয় সংযোগ আৰু কৰ্মসংস্থাপনৰ নতুন সুযোগ প্ৰদান কৰিব। ইতিমধ্যে ডিব্ৰুগড় বিশ্ববিদ্যালয়ে যোৱা বছৰ মিৰাই জাপানীজ লাৰ্নিং চেণ্টাৰৰ সৈতে বুজাবুজি চুক্তি স্বাক্ষৰ কৰিছিল।
জাপানী ভাষা প্ৰচলিত প্ৰতিস্থানসমূহত দক্ষ পেছাদাৰীসকলৰ ক্ৰমবৰ্ধমান চাহিদা পূৰণ কৰাৰ লক্ষৰে ছাত্ৰ-ছাত্ৰীসকলৰ বাবে জাপানী ভাষাৰ পাঠ্যক্ৰমৰ প্ৰৱৰ্তন কৰা হৈছে।
উল্লেখ্য যে ভাষা শিক্ষণৰ বিস্তৃত কাৰ্যসূচীৰ বাবে পৰিচিতএই মিৰাই জাপানীজ লাৰ্নিং চেণ্টাৰে জাপানী কোম্পানীত ১০০% প্লেচমেণ্ট প্ৰদান কৰে। জাপানে আন্তঃৰাষ্ট্ৰীয় দক্ষ পেছাদাৰীক সক্ৰিয়ভাৱে নিযুক্তি প্ৰদান কৰা লগে লগে এই পদক্ষেপে অসমৰ ছাত্ৰ-ছাত্ৰীসকলক উল্লেখযোগ্য সুবিধা প্ৰদান কৰিব বুলি আশা প্ৰকাশ কৰিছে। অৱশ্যে এই পদক্ষেপৰ জড়ি্য়তে অসমৰ ছাত্ৰ-ছাত্ৰীসকল প্ৰকৃতাৰ্থত উপকৃত হ’ব নে নহয় সেয়া লক্ষণীয় হ’ব।
