আমেৰিকাৰ ৰাষ্ট্ৰপতি হিচাপে কাৰ্যভাৰ গ্ৰহণ কৰাৰ পিছৰে পৰা ড’নাল্ড ট্ৰাম্পে এটাৰ পিছত এটাকৈ ডাঙৰ সিদ্ধান্ত লৈছে। ইয়াৰ ভিতৰত অন্যতম এটা হৈছে বিভিন্ন দেশৰ ওপৰত উচ্চ শুল্ক আৰোপ কৰাৰ বাৰ্তা।
শুল্ক আৰু পাৰস্পৰিক শুল্কৰ ওপৰত ট্ৰাম্পৰ মন্তব্যই বিশ্বৰ বজাৰত প্ৰত্যক্ষ প্ৰভাৱ পেলালে নেকি? অন্ততঃ সপ্তাহৰ দ্বিতীয়টো দিন মঙলবাৰৰ পৰিঘটনাবোৰে তেনেকুৱাই বুজাইছে।
সংবাদ সংস্থাৰ তথ্য অনুসৰি, সোমবাৰে আমেৰিকাৰ ৰাষ্ট্ৰপতি ড’নাল্ড ট্ৰাম্পৰ শুল্ক আৰোপৰ ফলত বিশ্বৰ সৰ্ববৃহৎ অৰ্থনীতিৰ মন্দাৱস্থাৰ সৃষ্টি হ’ব পাৰে বুলি ধাৰণাটো খাৰিজ কৰাৰ পিছতে এই ঘটনা পোহৰলৈ আহিছে। ট্ৰাম্পৰ ভাষণৰ পিছতে আমেৰিকাৰ শ্বেয়াৰ বজাৰত উদ্বেগ কেইবাগুণো বৃদ্ধি পালে। ব্যাপক হাৰত শ্বেয়াৰ বিক্ৰী আৰম্ভ হৈছে। বিনিয়োগকাৰীয়ে ততাতয়াকৈ শ্বেয়াৰ বিক্ৰী কৰিছে।
ট্ৰাম্পে কয় যে আমেৰিকাৰ অৰ্থনীতিয়ে এই সময়ত আচলতে সংক্ৰমণৰ সময় পাৰ কৰি আহিছে। ইয়াৰ দ্বাৰা গ্ৰাহকৰ চাহিদা আৰু কৰ্পৰেট বিনিয়োগ হ্ৰাস পাব পাৰে বুলি পৰ্যবেক্ষক মহলে ভাৱে।
ট্ৰাম্পৰ শুল্ক নীতি আৰু মন্তব্যক লৈ আমেৰিকাৰ শ্বেয়াৰ বজাৰ তীব্ৰভাৱে পতনমুখী হৈছে। ডাউ জ’নছ, এছ এণ্ড পি ৫০০ আৰু নাছডাকৰ দৰে ডাঙৰ সূচকাংকসমূহ যথেষ্ট হ্ৰাস পাইছে। ২০২২ চনৰ পিছত এই প্ৰথমবাৰৰ বাবে নাছডাকৰ এনে পৰিস্থিতিৰ সৃষ্টি হৈছে। এছ এণ্ড পি ৫০০ ফেব্ৰুৱাৰী মাহৰ সৰ্বোচচ হাৰৰ পৰা একেবাৰতে ৮ শতাংশ হ্ৰাস পাইছে।
টেছলাৰ শ্বেয়াৰৰ মূল্য ১৫.৪ শতাংশ হ্ৰাস পোৱাৰ বিপৰীতে এআই চিপ জায়ান্ট এনভিডিয়াৰ ৫ শতাংশতকৈও অধিক হ্ৰাস পাইছে। মেটা, আমাজন আৰু আলফাবেটকে ধৰি অন্যান্য টেক জায়ান্টসমূহৰ সূচকাংকও তীব্ৰ হ্ৰাস পোৱা দেখা গৈছে।
মঙলবাৰে পুৱা জাপানৰ নিকেই ২২৫ ২.৫ শতাংশ, দক্ষিণ কোৰিয়াৰ কস্পি ২.৩ শতাংশ আৰু অষ্ট্ৰেলিয়াৰ এছ এণ্ড পি/এ এছ এক্স ২০০ৰ ১.৮ শতাংশ হ্ৰাস পায়। পৰ্যবেক্ষক মহলৰ মতে, ৱাল ষ্ট্ৰীটত নিশাটোৰ ভিতৰতে পতনৰ পিছত এছিয়াৰ বজাৰত ব্যাপক বিক্ৰীৰ বাবে মঙলবাৰে ভাৰতীয় শ্বেয়াৰ বজাৰতো পতনৰ সম্ভাৱনা দেখা দিছে।
