লক্ষ্ণৌ ছুপাৰ জায়েন্টছ আই পি এলৰ প্ৰথমখন মেচত দিল্লী কেপিটেলছৰ হাতত পৰাস্ত হোৱাৰ পিছত সমালোচনাৰ সন্মুখীন হ’বলগীয়া হয়। অৱশ্যে কঠিন প্ৰতিদ্বন্দ্বী দলৰ বিৰুদ্ধে ঋষভ পন্তৰ দলটোৱে এক আচৰিত প্ৰত্যাৱৰ্তন কৰিলে। খেলখনত চাৰিটা উইকেট দখল কৰি জয়ৰ ভেটি গঢ়ি তোলে শাৰ্দুল ঠাকুৰে। তেওঁৰ দমনীয় বলিঙৰ বাবে হায়দৰাবাদে ৯ উইকেটত ১৯০ ৰান সংগ্ৰহ কৰিয়ে ইনিংছ সামৰে।
পিছত বেটিং কৰিবলৈ নামি নিকোলাছ পুৰাণ আৰু মিচেল মাৰ্ছে সেই ৰানৰ লক্ষ্য অতিক্ৰমৰ কামটো সহজ কৰি তোলে। ২৬টা বলত ৭০ ৰান সংগ্ৰহ কৰি লক্ষ্ণৌক জয়ৰ এখোজ ওচৰ চপাই নিবলৈ সক্ষম হয় পুৰানে। মিচেল মাৰ্ছে ৫২ ৰান সংগ্ৰহ কৰি তেওঁক যোগ্য সংগ দিয়ে। শেষত আব্দুল ছামাদে ৮ টা বলত ২২ ৰানৰ বিস্ফোৰক ইনিংছ খেলে। লক্ষ্ণৌ ছুপাৰ জায়েন্টছে ৫টা উইকেট হেৰুৱাই ১৬.১ অভাৰত লক্ষ্যত উপনীত হয়।
টছত জয়ী হৈ ঋষভ পন্তে প্ৰথমে বলিং কৰাৰ সিদ্ধান্ত লয়। বলাৰসকলে তেওঁৰ বিশ্বাসক মৰ্যাদা দিছিল। অকলে চাৰিটা উইকেট দখল কৰে শাৰ্দুল ঠাকুৰে। ইয়াৰ ভিতৰত অভিষেক শৰ্মা আৰু ঈশান কিষানৰ উইকেটো আছে। তেওঁ ৪ অভাৰত ৩৪ ৰান দি ৪ টা উইকেট দখল কৰে। তদুপৰি, আই পি এলত ১০০টা উইকেট দখল কৰি অভিলেখ গঢ়িবলৈ সক্ষম হয় শাৰ্দুলে।
আই পি এল কেৰিয়াৰত প্ৰথমটো উইকেট দখল কৰে প্ৰিন্স যাদৱে, তাকো ট্ৰেভিছ হেডক আউট কৰি। হায়দৰাবাদৰ হৈ সৰ্বোচ্চ ৪৭ ৰান সংগ্ৰহ কৰে হেডে। নীতিশ ৰেড্ডীয়ে ৩২ ৰান সংগ্ৰহ কৰাৰ বিপৰীতে ক্লাচেনে ২৬ ৰান সংগ্ৰহ কৰে। অৱশেষত অনিকেত ভাৰ্মাই ১৩টা বলত ২৬ ৰানৰ আক্ৰমণাত্মক ইনিংছ খেলে। কামিন্সে ৪টা বলত ৩টা ছয় মাৰি ১৮ ৰান সংগ্ৰহ কৰে। হায়দৰাবাদে ৯ উইকেটত ১৯০ ৰান সংগ্ৰহ কৰে।
১৯১ ৰানৰ লক্ষ্য অনুসৰণ কৰি লক্ষ্ণৌৰ বেটছমেনসকলে আৰম্ভণিৰে পৰাই আক্ৰমণাত্মক খেল খেলিছিল। দ্বিতীয় অভাৰত মহম্মদ ছামীয়ে মাৰ্কৰামক ১ ৰাণত ওভতাই পঠিয়াই আঘাত হানিছিল। কিন্তু তাৰ পিছত লক্ষ্ণৌৱে কেতিয়াও পিছলৈ ঘূৰি চাব লগা নহ’ল। নিকোলাছ পুৰাণ আৰু মিচেল মাৰ্ছে ১১৬ ৰানৰ পাৰ্টনাৰশ্বিপ গঢ়ি তুলিছিল। দুয়োগৰাকী বেটছমেনে ৮ অভাৰত দলৰ স্ক’ৰ ১০০ৰ ওপৰলৈ লৈ যায়। পুৰাণ বিধ্বংসী মেজাজত আছিল। এই কেৰিবিয়ান বেটছমেনগৰাকীয়ে ২৬টা বলত ৭০ ৰানৰ ইনিংছ খেলে। তেওঁৰ ইনিংছত ৬টা ছয় আৰু ৬টা চাৰি আছিল।
মিচেল মাৰ্ছে ৩১টা বলত ৫২ ৰান সংগ্ৰহ কৰে। অৱশ্যে এই মেচতো ঋষভ পন্তে বেটেৰে ব্যৰ্থ হয়। তেওঁ ১৫টা বলত ১৫ ৰান কৰে। শেষত আব্দুল ছামাদে ৮ বলত ২২ ৰানৰ আক্ৰমণাত্মক ইনিংছ খেলি অপৰাজিত হৈ থাকে। লক্ষ্ণৌৱে ৫টা উইকেট হেৰুৱাই ১৬.১ অভাৰত লক্ষ্যত উপনীত হয়। শ্বাৰ্দুল ঠাকুৰক মেন অৱ দ্য মেচ হিচাপে নিৰ্বাচিত কৰা হয়।
