চৰ্চাৰ অন্তপৰা নাই সাংবাদিক দিলৱাৰ হুছেইন মজুমদাৰৰ গ্ৰেপ্তাৰৰ ঘটনা। এতিয়াও সৰ্বত্ৰ চৰ্চা অব্যাহত সাংবাদিক গৰাকীক গ্ৰেপ্তাৰৰ ঘটনা। এই ঘটনাৰ প্ৰতিবাদ জনাই সাংসদ তথা কংগ্ৰেছ নেতা গৌৰৱ গগৈয়ে প্ৰধানমন্ত্ৰীলৈ পত্ৰ প্ৰেৰণ কৰিছে।
সাংসদগৰাকীয়ে এই পত্ৰৰ জড়িয়তে অসম আৰক্ষীৰ ক্ষমতাৰ অপব্যৱহাৰৰ তদন্তৰ লগতে এপেক্স বেংকত হোৱা কথিত বিত্তীয় কেলেংকাৰীৰ তদন্তৰ দাবী জনাইছে।
উল্লেখ্য যে দিলৱাৰ হুছেইন মজুমদাৰক বেংকৰ এজন কৰ্মচাৰী আৰু পৰিচালন সঞ্চালকৰ দুটা গোচৰৰ ভিত্তিত এই গ্ৰেপ্তাৰ কৰা হৈছিল। ইতিমধ্যে তেওঁ দুয়োটা গোচৰত জামিন লাভ কৰিছে।
গৌৰৱ গগৈয়ে পত্ৰত কৈছে যে, সাংবাদিকক এনেদৰে গ্ৰেপ্তাৰ কৰাটো আৰক্ষীৰ ক্ষমতাৰ অপব্যৱহাৰ। তেওঁ সংবাদ মাধ্যমৰ স্বাধীনতা ৰক্ষা আৰু জনস্বাৰ্থৰ বাতৰি দিয়া সাংবাদিকৰ সুৰক্ষাৰ কথাও উল্লেখ কৰিছে।
প্ৰথম গোচৰত জামিন পোৱাৰ পিছতো বেংকৰ পৰিচালন সঞ্চালক ডম্বৰু শইকীয়াৰ অভিযোগত পুনৰ গ্ৰেপ্তাৰ হয় সাংবাদিকগৰাকী। শুকুৰবাৰে দ্বিতীয় গোচৰত জামিন লাভ কৰি শনিবাৰে মুকলি আকাশৰ তললৈ আহে।
গগৈয়ে দাবী কৰিছে যে, বেংকৰ চৌহদত সাক্ষাৎকাৰ ল’বলৈ গৈ থাকোঁতে সাংবাদিকগৰাকীক আটক কৰা হৈছিল। এই ঘটনাই গণতন্ত্ৰ আৰু বিত্তীয় প্ৰতিষ্ঠানৰ স্বচ্ছতাত আঘাত হানিছে। সেয়ে তেওঁ প্ৰধানমন্ত্ৰীৰ হস্তক্ষেপৰ আহ্বান জনাইছে।
