শ্ৰীলংকা ভ্ৰমণত প্ৰাধানমন্ত্ৰী মোদী। শ্ৰীলংকাৰ ভূখণ্ডত ভাৰতৰ নিৰাপত্তা আৰু স্বাৰ্থৰ ক্ষতিৰ কৰা কোনো কাম নকৰে বুলি শনিবাৰে ৰাষ্ট্ৰপতি অনুৰা কুমাৰ দিছোনয়াই প্ৰতিশ্ৰুতি প্ৰদান কৰে। বিগত সময়ত দ্বীপ ৰাষ্ট্ৰখনত চীনৰ কাৰ্যকলাপে ভাৰতৰ উদ্বেগ বৃদ্ধি কৰিছে। এফালে যিদৰে চীনৰ চোৰাংচোৱা জাহাজৰ গতিবিধি শ্ৰীলংকাৰ জলসীমাত দেখা গৈছে, সেইদৰে কলম্বোৱে বেইজিঙৰ পৰা কোটি কোটি টকা ঋণ গৰহণ কৰিছে। এনে পৰিস্থিতিত থাইলেণ্ডত অনুষ্ঠিত বিমষ্টেক সন্মিলনৰ পিছত মোদীৰ শ্ৰীলংকা ভ্ৰমণ বিশেষ গুৰুত্ববহন কৰিছে।
শুকুৰবাৰে কলম্বোৰ বান্দাৰনায়কে আন্তঃৰাষ্ট্ৰীয় বিমানবন্দৰত দ্বীপ ৰাষ্ট্ৰখনৰ পাঁচজন মন্ত্ৰীয়ে ভাৰতীয় প্ৰধানমন্ত্ৰীক উষ্ম আদৰণি জনায়। শনিবাৰে পুৱা ইণ্ডিপেন্ডেন্স স্কুৱাৰত মোদীক আনুষ্ঠানিকভাৱে আদৰণি জনায় ৰাষ্ট্ৰপতি অনুৰা কুমাৰ দিশনায়েকে। তাতে মোডীক শ্ৰীলংকাৰ সৰ্বোচ্চ অসামৰিক সন্মান ‘মিত্ৰ বিভূষণ পদক’ প্ৰদান কৰা হয়। ২০১৯ চনত সংঘটিত হোৱা সন্ত্ৰাসবাদী আক্ৰমণেই হওক বা শেহতীয়া কভিড মহামাৰীৰ সংকটেই হওক ভাৰতে শ্ৰীলংকাৰ বিপদৰ সময়ত সহায় কৰি অহিছে বুলি উল্লেখ কৰে ৰাষ্ট্ৰপতি গৰাকীয়ে।
উল্লেখ্য যে ৫ এপ্ৰিল শণিবাৰে ভাৰত আৰু শ্ৰীলংকাই প্ৰতিৰক্ষা সহযোগিতাৰ ক্ষেত্ৰত এক গুৰুত্বপূৰ্ণ চুক্তি স্বাক্ষৰ কৰে। দুয়োখন দেশে ট্ৰিংকোমালিক শক্তিৰ কেন্দ্ৰ হিচাপে গঢ়ি তোলাৰ বাবে সন্মতি প্ৰকাশ কৰাৰ লগতে ভাৰতৰ সহযোগত শ্ৰীলংকাৰ পূব অঞ্চলৰ কেইবাটো উন্নয়ন প্ৰকল্পৰ বাবে চুক্তি স্বাক্ষৰিত হৈছে।
২০২৩ চনত চীনৰ চোৰাংচোৱা জাহাজ ‘ইউয়ান ৱাং ৫’ শ্ৰীলংকাৰ বন্দৰত উপস্থিত হৈছিল, সেই সময়ত ভাৰতত এই প্ৰেক্ষাপটে এক শক্তিশালী বাৰ্তা দিছিল। ইয়াৰ পিছত যোৱা বছৰৰ আগষ্ট মাহত পি এল এৰ জাহাজ ‘হাই ইয়াং ২৪ হাও’ শ্ৰীলংকা পাৰ হৈছিল। যদিও চীনে এই জাহাজসমূহ গৱেষণামূলক জাহাজ বুলি দাবী কৰে, তথাপিও চীনৰ যুদ্ধজাহাজসমূহে শ্ৰীলংকাৰ নৌসেনাৰ বন্দৰসমূহলৈ সঘনাই গৈ তেওঁলোকৰ পাৰমাণৱিক আৰু ক্ষেপণাস্ত্ৰ কাৰ্যসূচী নিৰীক্ষণ কৰাৰ আশংকা প্ৰকাশ কৰিছে ভাৰতে। এই সন্দৰ্ভত আমেৰিকাইও শ্ৰীলংকাক সকীয়াই দিছিল। ইয়াৰ পিছত কলম্বোৱে চীনৰ চোৰাংচোৱা জাহাজক নিজৰ বন্দৰত অৱস্থান কৰাত বাধা প্ৰদআন কৰে আৰু আজিৰ দিনটোতে শ্ৰীলংকাই ভাৰতক পোনপটীয়াকৈ আশ্বস্ত কৰি কয় যে ভাৰতৰ স্বাৰ্থ বা নিৰাপত্তাৰ বিৰোধী কোনো কার্যকলাপ শ্ৰীলংকাৰ ভূখণ্ডত তেওঁলোকে অনুমতি নিদিয়ে।
