কানাডাৰ ৰাজপথত নিৰ্বিচাৰ গুলীচালনাত নিহত হৈছে এগৰাকী ভাৰতীয় ছাত্ৰী। তেওঁ অন্টাৰিঅ’ৰ হেমিল্টনৰ মহ’ক কলেজত পঢ়ি আছিল। হেমিল্টন আৰক্ষীয়ে জনোৱা মতে, বুধবাৰে বাছ ষ্টপেজত ৰৈ আছিল হৰসিমৰাট ৰান্ধাৱা (২১) নামৰ ছাত্ৰীগৰাকী। সেই সময়ত এখন গাড়ীৰ পৰা চলোৱা গুলীত তেওঁ গুৰুতৰভাৱে আহত হৈছিল।
তাৰ পৰা হেমিল্টন আৰক্ষীয়ে তেওঁক চিকিৎসালয়লৈ লৈ যায় আৰু তাতেই তেওঁৰ মৃত্যু হয়। আৰক্ষীয়ে জনোৱা মতে, হেমিল্টনৰ আপাৰ জেমছ আৰু চাউথ বেণ্ড ৰোডৰ সমীপত এই গুলীচালনাৰ ঘটনা সংঘটিত হয়।
হেমিল্টন আৰক্ষীয়ে এক বিবৃতিত কয় যে হেমিল্টনৰ আপাৰ জেমছ আৰু চাউথ বেণ্ড ৰোডৰ ওচৰত বুধবাৰে স্থানীয় সময় অনুসৰি প্ৰায় ৭:৩০ বজাত তেওঁলোকে বন্দুকৰ গুলীৰ শব্দ শুনিছিল।
ঘটনাস্থলীত উপস্থিত হৈ আৰক্ষীয়ে গুলীবিদ্ধ অৱস্থাত হৰসিমৰাট ৰন্ধাৱাক উদ্ধাৰ কৰে। তেওঁক ততাতৈয়াকৈ চিকিৎসালয়লৈ লৈ যোৱা হয় যদিও তাতেই তেওঁৰ মৃত্যু হয়। আৰক্ষীয়ে ঘটনাৰ তদন্ত কৰি চিচিটিভিৰ ফুটেজ উদ্ধাৰ কৰে।
ফুটেজ পৰ্যালোচনা কৰাৰ পিছত হেমিল্টন আৰক্ষীয়ে জনোৱা মতে, এই ঘটনাৰ দিনটোত এখন ক’লা ৰঙৰ গাড়ীত থকা এজন লোকে বগা ৰঙৰ চেডান গাড়ীত থকা আৰোহীৰ ওপৰত গুলীচালনা কৰে। কিন্তু বাছ ষ্টপেজত থিয় হৈ থকা হৰসিমৰাট ৰন্ধাৱাৰ শৰীৰত গুলী লাগে। জানিব পৰা মতে, গুলীচালনাৰ কিছু সময়ৰ পিছতে গাড়ী দুখন তাৰ পৰা গুচি যায়।
আৰক্ষীয়ে জনোৱা মতে, অভিযুক্তই নিৰ্বিচাৰভাৱে গুলীচালনা কৰাৰ সময়ত স্থানীয় এটা ঘৰৰ খিৰিকীৰে গুলী সোমাই যায়। অৱশ্যে বন্দুকৰ গুলীত ঘৰৰ কোনো লোক আহত হোৱা নাই।
টৰন্টোত থকা ভাৰতৰ কনছুলেট জেনেৰেলে এই বিষয়ত শুকুৰবাৰে পোষ্ট কৰে। তেওঁ কয় যে ” অন্টাৰিঅ’ৰ হেমিল্টনত ভাৰতীয় ছাত্ৰী হৰসিমৰাট ৰান্ধৱাৰ কৰুণ মৃত্যুত আমি গভীৰভাৱে দুখী। স্থানীয় আৰক্ষীৰ মতে, তেওঁ নিৰীহ আছিল। নিৰ্বিচাৰ গুলীচালনাৰ সময়ত দুখন বাহনৰ মাজত পৰি যোৱাত গুলীবিদ্ধ হৈ মৃত্যু হয় হৰচিমৰাট ৰান্ধৱাৰ। এই হত্যাকাণ্ডৰ তদন্ত অব্যাহত আছে। আমি তেওঁৰ পৰিয়ালৰ সৈতে সংস্পৰ্শত আছো। এই কঠিন সময়ত আমাৰ প্ৰাৰ্থনা শোকসন্তপ্ত পৰিয়ালটোৰ সৈতে।”
