ভূস্বৰ্গ জম্মু-কাশ্মীৰত সৃষ্টি হৈছে আতংকময় পৰিস্থিতিৰ। বান আৰু ভূমিস্খলনে জম্মু-কাশ্মীৰৰ বিশাল অঞ্চলত ত্ৰাসৰ সৃষ্টি কৰিছে।
এই ভূমিস্খলনত এই পৰ্যন্ত ৩ জনৰ মৃত্যু হোৱা বুলি জানিব পৰা গৈছে। লগতে আহত হৈছে বহুতো লোক।
ভূমিস্খলনৰ ফলত জম্মু-কাশ্মীৰৰ কেইবাটাও গুৰুত্বপূৰ্ণ পথ বন্ধ হৈ পৰিছে।
সৰ্বভাৰতীয় সংবাদ মাধ্যমৰ সূত্ৰৰ মতে, ধাৰাসাৰ বৰষুণৰ ফলত হোৱা ভূমিস্খলন আৰু বানপানীৰ বাবে শ্ৰীনগৰ-জম্মু ৰাষ্ট্ৰীয় ঘাইপথ সম্পূৰ্ণৰূপে বন্ধ হৈ পৰিছে। ফলত হাজাৰ হাজাৰ গাড়ী আবদ্ধ হৈ পৰিছে।
প্ৰশাসনে জনাইছে যে ৰামবন জিলাই আটাইতকৈ বেছি ক্ষতিগ্ৰস্ত হৈছে। গাঁৱে-ভূঞে বিদ্যুৎ সংযোগ বিচ্ছিন্ন হৈছে।
ৰামবনত এই পৰ্যন্ত ৪০টা ঘৰ সম্পূৰ্ণৰূপে ভাঙি পৰা বুলিও প্ৰশাসনে জানিবলৈ দিয়ে। এশৰো অধিক গাঁওবাসীক উদ্ধাৰ কৰি নিৰাপদ আশ্ৰয় শিবিৰলৈ লৈ যোৱা হৈছে।
শ্ৰীনগৰ-জম্মু ৰাষ্ট্ৰীয় ঘাইপথকে ধৰি কেইবাটাও গুৰুত্বপূৰ্ণ পথত যান-বাহন চলাচল সম্পূৰ্ণৰূপে বন্ধ হৈ পৰিছে। ইতিমধ্যে আৰম্ভ হৈছে পথ চাফাই কাম। ধাৰাসাৰ বৰষুণৰ ফলত উদ্ধাৰ অভিযানত প্ৰায়ে বাধাৰ সৃষ্টি হৈছে। বতৰ বিজ্ঞান বিভাগে জানিবলৈ দিয়া মতে সোমবাৰলৈকে জম্মু-কাশ্মীৰত ধাৰাসাৰ বৰষুণৰ সম্ভাৱনা আছে। ইয়াৰ লগতে ঘণ্টাত ৭০ কিলোমিটাৰ পৰ্যন্ত বেগেৰে বতাহ বলিব পাৰে।
