নতুন দিল্লীত অনুষ্ঠিত দ্বিতীয় এছিয়ান যোগাসন স্পোৰ্টচ ছেম্পিয়নশ্বিপ ২০২৫ (2nd Asian Yogasana Sports Championship 2025) ত দুটাকৈ সোণৰ পদক অৰ্জনেৰে দেশৰ লগতে অসমলৈ সুনাম কঢ়িয়াইছে স্পৃহা হৃষি কাশ্যপে।
যোৱা ২৫ৰ পৰা ২৭ এপ্ৰিললৈ নতুন দিল্লীৰ ইন্দিৰা গান্ধী ইনড’ৰ ষ্টেডিয়ামত অনুষ্ঠিত এই প্ৰতিযোগিতাত অসমৰ কিশোৰী খেলুৱৈ স্পৃহা হৃষি কাশ্যপে ভাৰতক প্ৰতিনিধিত্ব কৰিছিল।
ছেম্পিয়নশ্বিপখনত তেওঁ দুটাকৈ শাখা ক্ৰমে- বেকবেণ্ডিং ব্যক্তিগত (Backbanding Individual ) আৰু পৰম্পৰাগত দলীয় শাখা (Traditional Group Event)ত সোণৰ পদক লাভ কৰে।
যোগাসন ভাৰতে আয়োজন কৰিছিল এই ছেম্পিয়নশ্বিপৰ। ইয়াত এছিয়াৰ ২১ খন দেশৰ ১৭০ গৰাকীৰো অধিক প্ৰতিযোগীয়ে অংশ লৈছিল।
উল্লেখ্য যে, এগৰাকী নৃত্য শিল্পী হিচাপেও চিনাকি লাভ কৰা স্পৃহাই জনপ্ৰিয় ৰিয়েলিটি শ্ব’ ‘চুপাৰ ডান্সাৰ ২’ত অংশগ্ৰহণ কৰি গৌৰৱ অৰ্জন কৰিছিল।
তেওঁ মৰিগাঁৱ নিবাসী জিতু বৰা আৰু লিপিকা হাজৰিকাৰ কন্যা। ১২ বছৰীয়া স্পৃহা হৃষি কাশ্যপ বৰ্তমান গুৱাহাটীৰ দিল্লী পাব্লিক স্কুলত অষ্টম শ্ৰেণীত অধ্যয়নৰত।
