অসমৰ প্রখ্যাত বড়ো কবি তথা লোককথাবিদ অনিল কুমাৰ বড়োক তেওঁৰ বড়ো সাহিত্যলৈ আগবঢ়োৱা অমূল্য অৱদানৰ বাবে পদ্মশ্ৰী সন্মানেৰে বিভূষিত কৰা হৈছে। তেওঁৰ সৃষ্টিশীল কৰ্মই বড়ো সাহিত্যক সমৃদ্ধ কৰি বিশ্বৰ মাজলৈ লৈ গৈছে। ৰাষ্ট্ৰপতি ভৱনত আয়োজিত এক বিশেষ অনুষ্ঠানত ৰাষ্ট্ৰপতি দ্ৰৌপদী মুৰ্মুৱে দেশৰ চতুৰ্থ সৰ্বোচ্চ অসামৰিক সন্মান পদ্মশ্ৰী বঁটা প্ৰদান কৰে।
গুৱাহাটী বিশ্ববিদ্যালয়ৰ লোককথা গৱেষণা বিভাগৰ মুৰব্বী হিচাপে কৰ্মৰত অধ্যাপকগৰাকীয়ে বড়ো লোককথা আৰু সাহিত্যক বিশ্বমঞ্চত প্ৰতিষ্ঠা কৰাত গুৰুত্বপূৰ্ণ ভূমিকা পালন কৰিছে। তেওঁ এতিয়ালৈকে কবিতা, সাহিত্য সমালোচনা, উপন্যাস, শিশু সাহিত্য, ভ্ৰমণ কাহিনী আৰু লোককথা অধ্যয়নৰ দৰে বিভিন্ন ধাৰা সামৰি ৩০ খনতকৈও অধিক গ্ৰন্থ প্ৰকাশ কৰিছে।
তেওঁৰ উল্লেখযোগ্য গ্ৰন্থসমূহৰ ভিতৰত ফ’ক লিটাৰেচাৰ অৱ দ্য বডোছ: এণ ইনট্ৰডাকচন, হিষ্ট্ৰী অৱ বড়ো লিটাৰেচাৰ, দ্য ফ্লুট এণ্ড দ্য বীনা, ডেলফিনি অনথাই মাউদাই আৰৱ গুহুন ক্ৰুবুন খোন্থাই আদি অন্যতম। এই গ্ৰন্থসমূহে আধুনিক বড়ো সাহিত্যক নতুন মাত্ৰা প্ৰদান কৰিছে।
অন্য ভাষাৰ সাহিত্যৰ অনুবাদৰ জৰিয়তে তেওঁ বড়ো পাঠকসকলক বিশ্ব সাহিত্যৰ সৈতে সংযোগ স্থাপনৰ সুযোগ প্ৰদান কৰিছে। সম্পাদক হিচাপে তেওঁ দ্য বড়ো কোৱাৰ্টাৰলি, জাৰ্নেল অৱ ফ’ক’ৰিষ্টছ, আৰু থুনছালাইৰ দৰে সাহিত্য সংকলন আৰু আলোচনী প্ৰকাশত গুৰুত্বপূৰ্ণ ভূমিকা পালন কৰিছে। কবি আৰু লোককথাবিদৰ উপৰিও অনিল বড়ো এজন প্ৰখ্যাত অনুবাদক, শিক্ষাবিদ আৰু সাহিত্য সমালোচকো।
সাহিত্যৰ বাহিৰেও অধ্যাপক বড়োৱে মাতৃভাষা শিক্ষাৰ প্ৰসাৰ আৰু বড়োলেণ্ডত ৰাষ্ট্ৰীয় শিক্ষা নীতি (NEP) ২০২০ ৰূপায়ণৰ বাবে কাম কৰি আহিছে। তেওঁ বড়ো সাহিত্য সভাৰ দৰে সাহিত্যিক সংগঠনত সক্ৰিয় অংশগ্ৰহণৰ লগতে ২০২১ চনৰ পৰা কোকৰাঝাৰ সাহিত্য মহোৎসৱৰ আয়োজনত মুখ্য ভূমিকা পালন কৰিছে।
ৰাষ্ট্ৰীয় আৰু আন্তঃৰাষ্ট্ৰীয় সন্মিলনত তেওঁৰ অংশগ্ৰহণে বড়ো সাহিত্য আৰু লোককথাক বিশ্বৰ বিভিন্ন দেশ যেনে গ্ৰীচ, ইটালী, লিথুৱেনিয়া, ডেনমাৰ্ক আৰু চীনৰ শৈক্ষিক মঞ্চত প্ৰতিনিধিত্ব কৰিছে।
তেওঁৰ অৱদানৰ স্বীকৃতি হিচাপে তেওঁক সাহিত্য অকাডেমী বঁটা (২০১২), ৰংছাৰ সাহিত্যপুৰস্কাৰ আৰু সাহিত্য সাধনা বোঠা (২০২৪) ৰ দৰে সন্মানেৰে বিভূষিত কৰা হৈছে। উল্লেখ্য যে বড়ো ভাষা ভাৰতীয় সংবিধানৰ অষ্টম অনুসূচীত তালিকাভুক্ত হোৱাৰ লগতে অসমৰ সহযোগী চৰকাৰী ভাষা আৰু দ্বাদশ শ্ৰেণীলৈকে শিক্ষাৰ মাধ্যম হিচাপে স্বীকৃত।
প্ৰসংগ ক্ৰমে ২০২৫ বৰ্ষৰত ৭ গৰাকীলৈ পদ্ম বিভূষণ, ১৯ গৰাকীলৈ পদ্ম ভূষণ আৰু ১১৩ট গৰাকীলৈ পদ্মশ্ৰী আগঢ়োৱা হৈছে।
