ভাৰতে তৎক্ষণাত কাৰ্যকৰী হোৱা কৈ পাকিস্তানৰ পৰা প্ৰত্যক্ষ আৰু পৰোক্ষ সকলো আমদানি সম্পূৰ্ণ নিষিদ্ধ কৰাৰ কথা ঘোষণা কৰিছে। জম্মু-কাশ্মীৰৰ পেহেলগামত সংঘটিত হোৱা মাৰাত্মক সন্ত্ৰাসবাদী আক্ৰমণৰ প্ৰতিক্ৰিয়া স্বৰূপে বাণিজ্য মন্ত্ৰালয়ে ২ মে’ত এই সিদ্ধান্তৰ বিষয়ে ঘোষণা কৰিছে। ৰাষ্ট্ৰীয় নিৰাপত্তা আৰু ৰাজহুৱা নীতিৰ উদ্বেগ প্ৰকাশ কৰি চৰকাৰে সীমা অতিক্ৰম কৰি উত্তেজনা বৃদ্ধি কৰা বাণিজ্যিক পথসমূহ বিচ্ছিন্ন কৰাৰ লক্ষ্যৰে এই কঠোৰ পদক্ষেপ গ্ৰহণ কৰা বুলি উল্লেখ কৰিছে। এই নিষেধাজ্ঞা সকলো সামগ্ৰীৰ ক্ষেত্ৰত প্ৰযোজ্য, সেয়া পোনপটীয়াকৈ পাকিস্তানৰ পৰা অহা হওক বা তৃতীয় দেশৰ জৰিয়তে হওক, আৰু পৰৱৰ্তী জাননী নিদিয়ালৈকে এই নিষেধাজ্ঞা চলি থাকিব বুলি সদৰী কৰিছে।
উল্লেখ যোজ্ঞ যে ২০১৯ চনৰ পুলৱামা আক্ৰমণৰ পিছত ভাৰতে পাকিস্তানী সামগ্ৰীৰ ওপৰত ২০০% শুল্ক আৰোপ কৰিছিল। তাৰ পিছৰে পৰা ভাৰত আৰু পাকিস্তানৰ মাজত বাণিজ্য কমি অহিছে। ২০২৪–২৫ চনত ভাৰতৰ মুঠ আমদানিত পাকিস্তানৰ অংশ আছিল মাত্ৰ ০.০০০১%, য’ত ফলমূল, তৈলবীজ আৰু ঔষধৰ দৰে সামগ্ৰীয়েই আটাইতকৈ বেছি অৰিহণা যোগাইছিল। কম পৰিমাণে হ’লেও কিছুমান সামগ্ৰী পৰোক্ষভাৱে আন দেশৰ মাজেৰে ভাৰতলৈ আহি আছিল। এই নতুন নিষেধাজ্ঞাই সেই সুৰুঙাবোৰ বন্ধ কৰিছে, ইয়াৰ জৰিয়তে এইটো নিশ্চিত হৈ পৰিছে যে কোনোধৰণৰ পাকিস্তানী সামগ্ৰীয়ে ভাৰতীয় বজাৰত প্ৰৱেশ কৰিব নোৱাৰে।
ভাৰতীয় বন্দৰৰ পৰা পাকিস্তানী জাহাজক বাধা দিয়া আৰু সিন্ধু জল সন্ধি স্থগিত ৰখাকে ধৰি ধাৰাবাহিক কাৰ্যসূচীৰ অংশ হিচাপে এই পদক্ষেপ গ্ৰহণ কৰা হৈছে বুলি জানিব পৰা গৈছে।ইয়াৰ সন্দৰ্ভত পাকিস্তানে তীব্ৰ প্ৰতিক্ৰিয়া প্ৰকাশ কৰি ভাৰতীয় বিমান সেৱাৰ বাবে আকাশমাৰ্গ বন্ধ কৰি দিছে, যাৰ ফলত এয়াৰ ইণ্ডিয়াৰ দৰে বিমান সংস্থাই লাখ লাখ লোকচানৰ সন্মুখীন হৈছে। এই নিষেধাজ্ঞাৰ ফলত পাকিস্তানৰ অৰ্থনীতিতো নেতিবাচক প্ৰভাৱ পৰিব বুলি আশা কৰা হৈছে, কিয়নো পাকিস্তানে এটা ডাঙৰ বাণিজ্যিক অংশীদাৰ হেৰুৱাই আৰু অধিক বিচ্ছিন্ন হৈ পৰিছে। ভাৰতৰ বাবে এই সিদ্ধান্তই সন্ত্ৰাসবাদৰ বিৰুদ্ধে নিজৰ স্থিতি শক্তিশালী কৰে যদিও পূৰ্ৱত পৰোক্ষভাৱে অধিগ্ৰহণ কৰা কিছুমান সামগ্ৰীৰ ব্যয় বৃদ্ধি পাব পাৰে। কূটনৈতিক সম্পৰ্ক উত্তেজিত হৈ থকাৰ সময়তে দুয়োখন দেশেই অধিক পৰিণতিৰ বাবে সাজু হৈছে। প্ৰতিবেশী দেশৰ সৈতে বাণিজ্যতকৈ নিৰাপত্তাক অগ্ৰাধিকাৰ দিয়াৰ ক্ষেত্ৰত উল্লেখযোগ্য পদক্ষেপ হিচাপে পৰিগণিত হৈছে
