অমৃতসৰ আৰক্ষীয়ে পহলগামত পাকিস্তানী চোৰাংচোৱা বুলি সন্দেহ কৰা দুজন লোকক গ্ৰেপ্তাৰ কৰে। গ্ৰেপ্তাৰ হোৱা লোকসকলৰ নাম হৈছে শ্বেৰ মাছিহ আৰু সুৰোজ মাছিহ। এক গোপন সূত্ৰৰ ভিত্তিত শনিবাৰে আৰক্ষীয়ে অমৃতসৰৰ পৰা গ্ৰেপ্তাৰ কৰে লোক দুজনক। আটকাধীন লোককেইজনে অমৃতসৰৰ ভাৰতীয় সেনা শিবিৰ আৰু বায়ুসেনাৰ ষ্টেচনৰ কেইবাটাও স্থানৰ ফটো তুলি পাকিস্তানৰ চোৰাংচোৱা সংস্থা আই এছ আইক চোৰাংভাৱে লৈ যোৱাৰ অভিযোগ উত্থাপন হৈছে।
আৰক্ষীয়ে জনোৱা মতে, পূৰ্বে সাধাৰণ জনতাৰ সৈতে মিহলি হৈ আছিল অভিযুক্তসকল। আৰু সুযোগ লৈ তেওঁলোকে বিভিন্ন স্পৰ্শকাতৰ ঠাইৰ ফটো তুলি চোৰাংভাৱে পাকিস্তানলৈ লৈ গৈছিল।
প্ৰাৰম্ভিক তদন্তৰ সময়ত আৰক্ষীয়ে শ্বেৰ আৰু সুৰজৰ প্ৰত্যক্ষ যোগাযোগ অমৃতসৰ কেন্দ্ৰীয় সংশোধনী কেন্দ্ৰৰ বন্দী হৰপ্ৰীত সিং ওৰফে হেপ্পীৰ সৈতে হোৱা বুলি জানিব পৰা গৈছে। আৰক্ষীৰ সূত্ৰ অনুসৰি শ্বেৰ আৰু সুৰজে ভাৰতীয় সেনাৰ বহু গোপন আত্মগোপন স্থান আৰু ঘাটিটোৰ বিভিন্ন স্পৰ্শকাতৰ অঞ্চলৰ ফটো তুলিছিল। তাৰ পিছত পাকিস্তানলৈ পঠিয়াই দিছিল। মন কৰিবলগীয়া যে কিছুদিন পূৰ্বে ৰাজস্থানৰ পৰা পাথান খান নামৰ এজন লোকক পাকিস্তানী চোৰাংচোৱাৰ সন্দেহত গ্ৰেপ্তাৰ কৰিছিল আৰক্ষীয়ে।
যোৱা ২২ এপ্ৰিলত কাশ্মীৰৰ পহলগামত সংঘটিত সন্ত্ৰাসবাদী আক্ৰমণত ২৫ জন পৰ্যটককে ধৰি মুঠ ২৬ জন লোক নিহত হৈছিল। তাৰ পাছৰে পৰা সেনাই সন্ত্ৰাসবাদীৰ সন্ধানত উপত্যকাৰ সিপাৰে অনুসন্ধান আৰম্ভ কৰিছে। এই পৰিবেশত চোৰাংচোৱা সংস্থাসমূহে সন্দেহ কৰিছে যে উগ্ৰপন্থীয়ে দেশৰ অন্য প্ৰান্তত আক্ৰমণ চলাব পাৰে। দেশৰ কেইবাটাও গুৰুত্বপূৰ্ণ স্থানত হাই এলাৰ্ট জাৰি কৰা হৈছে। ইফালে অমৃতসৰৰ পৰা দুজন পাকিস্তানী চোৰাংচোৱাক গ্ৰেপ্তাৰ কৰা ঘটনাই চোৰাংচোৱা সংস্থাসমূহৰ মাজত উদ্বেগ প্ৰকাশ কৰিছে।
