পুনৰ অপাৰেচন সিন্দূৰৰ জৰিয়তে ভাৰতে পাকিস্তান আৰু পাকিস্তান দখলকৃত কাশ্মীৰৰ সন্ত্ৰাসবাদী শিবিৰত নিৰ্ণায়ক আক্ৰমণ চলায়। চৰকাৰী শীৰ্ষ সূত্ৰই জনোৱা মতে, আকাশত বায়ুসেনা আৰু স্থলভাগত সেনাবাহিনীয়ে যুটীয়া আক্ৰমণ চলাইছিল।
ভাৰতীয় বায়ুসেনাই আকাশৰ পৰা ভূপৃষ্ঠলৈ ক্ষেপণাস্ত্ৰ আক্ৰমণ চলাই থকাৰ সময়তে ভাৰতীয় সেনাই একে সময়তে পৃষ্ঠৰ পৰা পৃষ্ঠলৈ ক্ষেপণাস্ত্ৰ নিক্ষেপ কৰে বুলি সূত্ৰই ৰাষ্ট্ৰীয় সংবাদ মাধ্যম ইণ্ডিয়া টুডে-এ জনাইছে।
নিষিদ্ধ সংগঠন জইছ-ই-মহম্মদ, লস্কৰ-ই-তৈইবা, আৰু হিজবুল মুজাহিদ্দীনৰ সৈতে জড়িত সন্ত্ৰাসবাদী আন্তঃগাঁথনিসমূহক লক্ষ্য কৰি লোৱা বুলি জানিব পৰা গৈছে। নিশাৰ এই অভিযানত ৮০ৰো অধিক সন্ত্ৰাসবাদী নিহত হয়।
সূত্ৰই জনোৱা মতে, এই বহুমুখী আক্ৰমণ পাকিস্তানক সন্ত্ৰাসবাদী যন্ত্ৰক সমৰ্থন কৰা বন্ধ কৰাৰ সতৰ্কবাণী আছিল, যাৰ ফলত পাকিস্তানৰ সন্ত্ৰাসবাদী যন্ত্ৰ পংগু হৈ পৰিছে। ইয়াৰ উদ্দেশ্য আছিল ভাৰতৰ বিৰুদ্ধে সন্ত্ৰাসবাদী কাৰ্যকলাপৰ সমৰ্থন বন্ধ কৰিবলৈ ইছলামবাদলৈ স্পষ্ট বাৰ্তা প্ৰেৰণ কৰা বুলি বিষয়াসকলে উল্লেখ কৰে।
চৰকাৰী সূত্ৰই লগতে কয় যে আক্ৰমণ আৰম্ভ হোৱাৰ পূৰ্বে নতুন দিল্লীয়ে বিশ্বৰ গুৰুত্বপূৰ্ণ শক্তিসমূহৰ পৰা কূটনৈতিক সমৰ্থন লাভ কৰিছিল। ভাৰতে আমেৰিকা, ব্ৰিটেইন, ফ্ৰান্স, ৰাছিয়াৰ পৰা মুকলি সমৰ্থন লাভ কৰা বুলি সূত্ৰই প্ৰকাশ কৰে আৰু লগতে কয় যে চীনৰ সঁহাৰিক নিৰপেক্ষ বুলি অভিহিত কৰা হৈছে যদিও উপসাগৰীয় ৰাষ্ট্ৰসমূহে ভাৰতৰ সৈতে একত্ৰিত হোৱা দেখা গৈছে, যাৰ ফলত পাকিস্তান কূটনৈতিক ক্ষেত্ৰত বহুলাংশে বিচ্ছিন্ন হৈ পৰিছে।
তুৰস্কৰ বাহিৰে আন কোনো দেশেই ইছলামাবাদক মুকলিকৈ সমৰ্থন কৰা নাছিল বুলি সূত্ৰই জনাইছে আৰু ইয়াক ভাৰতৰ বাবে এক উল্লেখযোগ্য কূটনৈতিক জয় বুলি অভিহিত কৰিছে।
ভাৰতে অৱশ্যে স্পষ্টকৈ উল্লেখ কৰে যে, ভাৰতে তীব্ৰতৰ পৰিস্থিত নিবিচাৰে কিন্তু ৰাষ্ট্ৰীয় নিৰাপত্তা উপদেষ্টা অজিত ডোভালে কয় যে পাকিস্তানে প্ৰতিশোধ ল’লে ভাৰতে কঠোৰ প্ৰত্যুত্তৰ দিবলৈ সাজু।
