শনিবাৰে সন্ধিয়া ৫ বজাত যুদ্ধবিৰতি চুক্তি ঘোষণা কৰা হয়। কিন্তু সেই ঘোষণাৰ মাত্ৰ ৩ ঘণ্টাৰ পিছত পাকিস্তানে যুক্তি বিৰতি উলংঘা কৰিলে। জম্মু-কাশ্মীৰৰ সীমান্তৰ কমেও ১১টা স্থানত গুলীচালনা কৰে। ড্ৰ’ন আক্ৰমণৰ চেষ্টাও কৰা হৈছিল। পাকিস্তানৰ আক্ৰমণত সীমান্তত শ্বহীদ হয় বি এছ এফৰ উপ পৰিদৰ্শক মহম্মদ ইমতিয়াজ। লগতে আৰু ৭ জন লোক আহত হোৱাৰ খবৰ পোৱা গৈছে।
জম্মু-কাশ্মীৰৰ আৰ এছ পুৰা ছেক্টৰত পাকিস্তানৰ আক্ৰমণৰ সৈতে মোকাবিলা কৰি আছিল বি এছ এফৰ উপ-পৰিদৰ্শক মহম্মদ ইমতিয়াজকে ধৰি আন সহকৰ্মীসকলে। তাতেই তেওঁৰ মৃত্যু হয়। ইতিমধ্যে বি এছ এফৰ জম্মু শাখাই ছচিয়েল মিডিয়াত মৃত্যুৰ খবৰ প্ৰকাশ কৰে। আন ৭ জন আহত লোক ওচৰৰ চিকিৎসালয়ত চিকিৎসাধীন হৈ থকা বুলি জানিব পৰা গৈছে।
শনিবাৰে সন্ধিয়া ৭:৩০ বজাৰ কিছু সময়ৰ পাছতে জম্মু-কাশ্মীৰ সীমান্তত বন্দুকৰ গুলীৰ শব্দ শুনা যায়। কেৱল সেয়াই নহয়, জম্মু-শ্ৰীনগৰকে ধৰি কেইবাটাও অঞ্চলত ছাইৰেন বজাব লগা হৈছিল আৰু তাত ড্ৰ’ন আক্ৰমণ সংঘটিত হৈছিল বুলি সূত্ৰই প্ৰকাশ কৰিছে। জম্মু-কাশ্মীৰৰ বাৰামুল্লা আৰু বুডগামতো বন্দুকৰ গুলীৰ শব্দ শুনা যায়। কাশ্মীৰৰ বাহিৰে ৰাজস্থানৰ বাজমেৰতো ছাইৰেন বাজিছে। তাতো ব্লেকআউট কৰা হৈছে।
অৱশ্যে শেহতীয়া খবৰ অনুসৰি পাকিস্তানে সীমান্তত গোলাবৰ্ষণ বন্ধ কৰি দিছে। ড্ৰ’ন আক্ৰমণকে ধৰি সকলো পৰিকল্পনা ভাৰতে বিফল কৰিছে। জোৱানসকলে কেইবাখনো পাকিস্তানী ড্ৰ’ন গুলীয়াই ভূপতিত কৰে। কিন্তু তেওঁলোক সতৰ্ক। কাৰণ পাকিস্তানী সেনাই পুনৰ আক্ৰমণ কৰিব পাৰে বুলি আশংকা কৰা হৈছে।
যুদ্ধবিৰতি ঘোষণা হোৱাৰ পাছত জম্মু-কাশ্মীৰৰ লগতে সীমান্তৱৰ্তী ৰাজ্যসমূহৰ জনসাধাৰণে কিছু সকাহ অনুভৱ কৰে। তেওঁলোকে ভাবিছিল পৰিস্থিতি স্বাভাৱিক হ’ব। কিন্তু সেয়া নহ’ল। এই যুদ্ধবিৰতি চুক্তি কিমান দিনলৈ স্থায়ী হ’ব সেই সম্পৰ্কে ইতিমধ্যে প্ৰশ্ন উত্থাপন হৈছে।
